Gizartea -
Greba Iberian
Iberiako grebak ia 180 hegaldi bertan behera utziko ditu Euskadin
Air Nostrum eta Vueling konpainiek ere hainbat hegaldi bertan behera utzi behar izan dituzte ez dutelako lurreko asistentziarik jasoko.
Erredakzioa
Hurrengo astean Iberian egingo duten greba dela eta ia 180 hegaldi bertan behera utzi dituzte Euskadiko aireportuetan. Izan ere, Air Nostrum eta Vueling konpainiek ere hainbat hegaldi bertan behera utzi behar izan dituzte protesta horren eraginez.
Martxoaren 4tik 8ra bitartean Bilboko aireportuan abiapuntua edo helmuga duten 46 hegaldi bertan behera utziko dituela iragarri du Iberiak bere webgunean. Hegaldi horiek guztiak Bilbo eta Madril lotzen dituzte.
Grebak beste hainbat airelineari eragingo die, ez dutelako Iberiak Airport Servicek ohi bezala eskaintzen duen lurreko asistentziarik jasoko. Hala, Air Nostrumek, bere webgunean iragarri duenez, 85 hegaldi bertan behera utziko ditu Euskadiko aireportuetan, martxoaren 4tik 8ra bitartean.
Horien 47k Bilboko aireportua Santiagorekin, Valentziarekin eta Vigorekin lotzen zituzten.
Gainera, Air Nostrumek bertan behera utzitako beste 38 hegaldiek Donostia eta Madril lotzen zituzten.
Vueling konpainiak, berriz, hurrengo asterako 46 hegaldi bertan behera utzi dituela iragarri du. Horiek guztiek Bilboko aireportua Bartzelonarekin, Sevillarekin, Malaga eta Londresekin lotzen zuten.
