Greba eguna dute gaur ere eskola publikoetako jantokietan

Gaur greba egingo dute eskola publikoetako jantokietan, sindikatuen eta sektoreko enpresen artean akordiorik ez dagoelako.

Asteartean bilera berri bat izango dute, eta akordiorik lortzekotan, izan liteke asteazkenerako deitutako greba bertan behera geratzea.

Akordio eza

ELA, LAB, CCOO eta UGT sindikatuek greben egutegia mantentzea erabaki zuten ostiralean enpresekin bildu ostean, gauza txikietan ere akordiorik lortu ez zutelako.

Sindikatuen arabera, enpresek egindako planteamendu bakarra bilerak egiteko egutegi bat finkatzea izan da, eta euren eskaintza mantendu dute.

Bestalde, sindikatuek bilera egutegi hori mantentzea onartu zuten, baina "patronalak egoera honen aurrean duen jarrera guztiz etsigarria" dela adierazi zuten.

Zerbitzu hobeagoa

Langileen lan baldintzak eta jantokien zerbitzua hobetzeko "borrokan" jarraituko dutela adierazi du ELAk.