240.000 euro, Kamiñaldeko bizilagunei laguntzeko

Eusko Jaurlaritzak 240.000 euroko premiazko aurrekontu-saila bideratuko dio Ondarroako Udalari, Kamiñaldeko luiziaren ondorioz kaltetutako pertsonen “oinarrizko beharrak” kudea ditzan, EAEko Exekutiboak agiri batean azaldu duenez.

Enplegu eta Gizarte Politiketako sailburu Angel Toñaren proposamenez, Eusko Jaurlaritzak San Inazio kaleko 475 bizilagunen “behar oinarrizkoenak (etxetresna elektrikoak, etxeko gaiak, alokairua, etab.) estaltzeko neurria” onartu du. Luizien ondorioz, beren etxebizitzak utzi behar izan zituzten martxoaren 8a eta 12a bitartean.

Hondamendiak gizarte-larrialdiko laguntzetatik eta bestelako prozeduretatik kanpo geratzen direnez, bide horretatik bideratu izan balira, kaltedunek laguntzak jasotzeko epea luzeegia izango litzateke. Horregatik, Jaurlaritzak premiazko bidea hautatu du, Exekutiboak berak argitutakoaren arabera.

Aurreikuspenen arabera, luiziak kaltetutako etxebizitzetako lehen lerroko bizilagunek ezingo dute gutxienez urtebetean itzuli euren etxeetara, eta, gainerakoek, gutxienez lau hilabetean.

Enplegu eta Gizarte Politiketako Sailak eta Ondarroako Udalak batzorde misto parekide bat osatzea aurreikusi dute diru-laguntzen kudeaketa ikuskatzeko.