Beste salaketa bat aurkeztu dute Iruñeko sanferminetan, sexu-abusuengatik

Iruñeko Udaleko Babes Zibileko Tokiko Batzordeak gaur goizean jakinarazi duenez, azken orduetan emakume batek salaketa bat aurkeztu du sexu-abusuengatik (ukituak).

Udalak ohar bidez jakinarazi duenez, salaketaren ondotik, emakumearen eskura jarri du kasu hauetarako duen laguntza zerbitzua, orientazioa eta laguntza judizial zein psikologikoa emateko.

Protokolo berria abiarazita Iruñeko Udalak lortu nahi duen helburuetako bat biktimak babestea da, bai arreta eta laguntza bai informazioa emanez.

Udal arduradunek argi esan dute edozein abusu gertatzen dela ere salatu egin behar dela bai arlo judizialean bai gizarte mailan ere, "arbuio aktiboa baita jarrera matxista hauekin amaitzeko modurik onena".

Bestalde, Udalak AgreStop/EraStop doako aplikazio garatu du, eraso matxista salatzen duten emakumeak geolokalizatzeko eta berehala Udaltzaingoa jakinaren gainean jartzeko.

_________________________

Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak edota deitu telefono hauetako batera: 900 840 111 (Euskadin) edo 016 (Estatu osoan); doakoak dira eta ez dute arrastorik uzten fakturan.