Gasteizko Gaztetxean atxilotutako bat espetxera bidali dute

Gasteizko Gaztetxean urtarrilaren 1ean atxilotutako bost lagunetik bat Zaballako (Araba) espetxera bidali dute, bilaketa-agindu judiziala baitzuen bere gain, Hala Bedik jakitera eman duenez.

Gasteizko Guardiako Epaitegian izan ostean atxilotu dute. Gazteak atxilotzeko agindu judiziala eta agintaritza-agenteen aurka atentatua egin izanagatik kartzelan sartzeko agindua bazuen aurretik, Gasteizko Udalak urtarrilaren 2an jakitera eman zuenez.

Urtarrilaren 1ean bost lagun atxilotu zituzten Gasteizko Gaztetxean sortutako istiluetan; horietatik, ostera, lau lagun egun horretan bertan aske utzi zituzten, eta epailearen aurrean deklaratu beharko dute, Gasteizko Argibideetako 3. Epaitegiak ikerketa abiatu baitu gertatutakoa argitzeko.

Urtarrilaren 1ean Udaltzaingoa Gasteizko Gaztetxean sartu zen, "zarata" gehiegi egiten ari zirela ohartarazi eta Urtezahar-gaueko festa amaitutzat eman behar zutela jakinarazteko. Istiluak izan ziren, bost pertsona atxilotu zituzten eta tartean zenbait udaltzain zauritu ziren.

Gasteizko Gazte Asanbladaren bertsioa, berriz, oso bestelakoa da. Gaztetxea jendez hustu ez zutela argitu ostean, Udaltzaingoa "inongo aurre-abisurik gabe eta oso modu oldarkorrean" sartu zela salatu du.