31 urteko gizon bat atxilotu dute Gasteizen, bikotekidea jotzeagatik

Udaltzaingoak 31 urteko gizon bat atxilotu zuen atzo Gasteizen, seme-alabak aurrean zituela bikotekidea jotzea egotzita.

Eraso matxista goizaldean gertatu zen Arana auzoko lonja batean, emakumea bertatik irtetera zihoala. Antza denez, festa bat egiten ari ziren bertan.

Emakumearen eta hainbat lekukoren testigantzaren arabera, erasotzaileak emakumea iraindu eta jo zuen.

Biktimaren eta lekukoen testigantzak entzun eta emakumearen markak ikusitakoan, udaltzainek gizona atxilotu zuten genero indarkeria delitua leporatuta. Atxilotua gaur igaroko da epailearen aurretik.

________________________________________

Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak edota deitu telefono hauetako batera: 900 840 111 (Euskadin) edo 016 (Estatu osoan); doakoak dira eta ez dute arrastorik uzten fakturan.