Gizartea -

matxismoa

Pintaketa faxistak egin dituzte berriro 'Pikara Magazine' eta Irantzu Valeraren aurka

"52" (Voxek eskuratutako eserleku kopurua) eta "indarkeriak ez du generorik" margotu diete. Erantzun gisa, kanpaina abiatu dute sare sozialetan.

Faktoria Lilan egindako pintaketetako bat. ETBko bideo batetik ateratako argazkia
Faktoria Lilan egindako pintaketetako bat.
Pintaketak egin dituzte berriro Pikara Magazine aldizkariaren Bilboko egoitzan

0:36

EITB.EUS

Whatsapp Facebook Twitter Telegram Email

Pikara Magazine aldizkari feministaren eta Irantzu Varela ekintzailearen kontrako pintaketa faxistak egin dituzte berriro, hedabideak eta komunikatzaileak ohar baten bidez salatu dutenez. Pintaketak astearte goizean agertu dira, biek Bilboko Lamana kalean partekatzen dituzten bi lokaletan.

Zehazki, alderdi falangistak sinatutako pintaketetan, "52" (Voxek A10ean lortutako eserleku kopurua) eta "indarkeriak ez du generorik" (alderdi ultraeskuindarrak hala du jasota bere hauteskunde programan) idatzi dituzte. Horrez gain, beste pintaketa batek Irantzu Varela Pikara Magazine aldizkariaren kolaboratzaile eta Faktoria Lilako burua du jomuga.

Ohar batean kritikatu dutenez, "eraso matxista eta faxista hau ez da berria: duela bi aste antzeko erasoa jasan zuen aldizkariak eta Irantzu Valerak sufritu duen bosgarrena da". Erasook ez dira kontu isolatua. Varelak berak eta aldizkariko kide batzuek Twitterren maiz jasan dituzte erasoak.

"Irantzu Varelari egiten zaizkion eraso hauek mugimendu feminista osoari egiten zaizkiola uste dugu; izan ere, erasoen jomuga da feminismoaren baitan pertsona ezaguna delako. Gainera, komunikabide bati egindako pintaketa hauek adierazpen-askatasunaren kontrako erasoak ere badira", nabarmendu dute.

Erasooi erantzuteko asmoz, sare sozialetan kanpaina abiatu dute Pikara Magazinek eta Irantzu Varelak #APorTodas traolarekin —Santiago Abascalek hauteskunde gauean botatako esaldi bati buelta emanez—. "Beldurrik ez dugula adierazteko" bideoak, memeak eta mezuak partekatzeko eskatu diete erabiltzaileei.

"Argi dugu erasoa guk jasan behar izan dugula, baina denoi zuzenduta dagoela. Gainera, guk ez diogu idazteari, sortzeari, pentsatzeari ezta sarea eratzeari ere utziko. Guk honi aurre egingo diogu, isilik nahi gaituztelako", adierazi dute.

Hau zure interesekoa bada, baliteke beste gai hauek ere izatea
Bilbo Indarkeria matxista Gizartea Eguneko albisteak Albisteak Matxismoa Feminismoa Vox