Hauek dira 2019an eitb.eus atarian gehien ikusi diren edukiak

Badoa 2019 urtea eta harekin batera aurtengoan denon ahotan izan ditugun albiste eta gertakariak. Denetik izan da, baina guztiek ez dute sarean arrakasta bera izan eta eduki batzuk, besteak baino gehiago jarraitu dira. eitb.eus atarian 2019 honetan gehien ikusi diren edukien zerrenda egin dugu, Google Analyticsek emandako eta OJDk egiaztatutako datuen arabera. 

Francisco Franco diktadorearen deshobiratzea izan da eitb.eus atariko eduki ikusienetakoa. Espainiako gobernuak diktadorea Erorien Haranetik ateratzeko hartutako erabakiak, eta ondoren haren deshobiratzeak jarraipen zabala izan dute.

Korrika euskararen aldeko lasterketak ere arrakasta handia izan du eitb.eus-en. Ibilbidea, zuzeneko irudien emankizuna, albisteak eta argazkiak kontsultatu dituzte erabiltzaileek. Kultura arloan berriz, Jon Barberena bertsolariaren heriotzak sarea astindu zuen. Baita Iruñeko udalak Pirritx, Porrotx eta Marimotots pailazoen emankizuna bertan behera uzteko hartutako erabakiak ere.

ETBko saioetako bideoek jarraipen zabala izan dute. Gure Kasa saioko bideoak dira horren adibide.

Joseba Etxeberria eta Gorka Iraizoz Athleticeko jokalari ohien elkarrizketak, eta taldekide ohiek bidalitako mezuak izan dira eduki jarraituenak.

Fermin Etxegoien eta 'Pagadi'k gidatzen zuten Autentikoak saioko elkarrizketak ere oso bisitatuak izan dira. Martxelo Otamendik egindako adierazpenak horien artean. Berria egunkariko zuzendariak torturen eta minbiziaren inguruan hitz egin zuen. Klaudio Landak aurkezten duen Egunak egin du saioan Alex Sardui Gatibu taldeko abeslariari egindako elkarrizketa ere milaka lagunek ikusi dute.

3 Ene Kantak saioko bideo bat ere ikusienean artean dago. ETBk abian jarri duen haurrentzako saioa ikastetxez ikastetxe ibiltzen da eta, eta Antsoaingo Ezkaba eskolako kideekin abestutako ‘Azokara’ abestiak arrakasta itzela izan du.

Hau da eitb.eus atarian 2019an ikusienak izan diren edukien zerrenda.

1-Franco urriaren 25a baino lehen hobitik ateratzeko asmoa du Espainiako Gobernuak

2-Iraolak, Adurizek eta Alkortak mezu bat bidali nahi izan diote Etxeberriari

3-Koikili, de Marcos, San Jose, Gurpegi eta Balenziagaren mezuak Gorka Iraizozi

4-21. Korrikaren ibilbidea, herriz herri

5-Jon Barberena bertsolari eta idazlea zendu da

6- Ene Kantak taldearen 'Azokara' abestia

7-Alex Sardui: 'Kontzertukoa kontzertuan bertan geratu behar zen'

8-ETBko kamerari bati eraso egin diote Iturengo ihauterietan

9-Iruñeko Udalak bertan behera utzi du Pirritx, Porrotx eta Marimototsen ikuskizun bat

10-Otamendi: ‘Sei torturatuetatik hiruk minbizia garatu dugu eta bat hil egin da’