Gizartea -

Koronabirusa

Sindikatuek osasun arloko langileen segurtasuna bermatzeko eskatu diote Osakidetzari

Halaber, 12:00etan jarduera eten eta bost minutuko isilunea egiteko deia egin die euskal gehiengo sindikalak Osakidetzako langileei, koronabirusaren eraginez hil den erizaina gogoan izateko.

Basurtuko Ospitalea (Bilbo). Argazkia: EFE
Basurtuko Ospitalea (Bilbo).
Basurtuko Ospitalea (Bilbo). Argazkia: EFE

Agentziak | Erredakzioa

Whatsapp Facebook Twitter Telegram Email

Koronabirusaren eraginez hil den Osakidetzako erizainaren "berri tamalgarriaren aurrean", SATSE, ELA, LAB, SME, CCOO, UGT, ESK, SAE eta UTESE sindikatuek "ezinbestekotzat" jo dute Osakidetzak "norbera babesteko ekipamenduen eta langileen segurtasuna eta osasuna babesteko beharrezkoak izan daitezkeen gainerako materialen hornidura bermatzea". 

Ohar batean azpimarratu dutenez, "beste behin ere, laneko segurtasunak eta osasunak bateragarriak izan behar dute lanarekin eta herritarrei funtsezko zerbitzu bat eskaintzearekin".

"Lan-jardueraren ondorioz gertatu den zoritxarreko gertaera honen aurrean ezinbestekoa da Osakidetzak norbera babesteko ekipamenduen eta plantillaren segurtasuna eta osasuna babesteko beharrezkoak izan daitezkeen gainerako materialen hornidura bermatzea. Langileei prestakuntza eta informazio nahikoa ere eman behar die", nabarmendu dute.

Era berean, Eusko Jaurlaritzak eta Osakidetzak berak plan bat artikulatu behar dutela gaineratu dute, segurtasun-neurriak betetzen direla bermatzeko. "Ezin dugu hornidurarik gabeko agertoki bat onartu. Horregatik, behar diren materialen erabilgarritasuna bermatzeko plan bat behar da", adierazi dute.

Sindikatuen arabera, "langileen segurtasuna eta osasuna bermatu behar dira, uneotan hain beharrezkoa den osasun-laguntza ere eman daitekeela bermatzeko".

Hori dela eta, "berehala jarduteko" eskatu diete Eusko Jaurlaritzari eta Osakidetzari, eta "nahitaez funtzionatzen jarraitu behar duten oinarrizko zerbitzuetan" segurtasuna bermatzeko "ahalegin guztiak" egin behar direla ohartarazi dute.

Xingola beltza

Bestalde, hildako 52 urteko erizainaren familiari elkartasuna adierazteko eta Osakidetzari berehalako neurriak har ditzala eskatzeko, sindikatuek datozen bi egunetan xingola beltz bat eramateko eta leihoetatik trapu beltzak zintzilikatzeko eskatu diete osasun arloko langileei.

Halaber, 12:00etan euren jarduera eten eta hildako lankideagatik bost minutuko isilunea egiteko deia egin diete SATSE, ELA, LAB, SME, CCOO, UGT, ESK, SAE eta UTESE sindikatuek langileei.

Kontuan izan osasun agintariek koronabirusaren aurrean eman dituzten aholkuak. Albiste faltsuak zabaldu arren, agintariek emandakoei bakarrik egin kasu. Zalantzarik baduzu edo gaitza hedatu den gune batera bidaian joan ostean sintomarik baduzu, Osasun Kontseiluaren telefonora dei dezakezu: 900 20 30 50 (EAE) eta 948 290 290 (Nafarroa). Gogoratu COVID-19 gaitza ez hedatzeko modurik eraginkorrena eskuak sarri garbitzea dela; ahoa estaltzeko maskarak bakarrik dira gomendagarriak sintomak badituzu edo adineko pertsonekin edo immunodeprimituekin harremanetan bazaude.

Hau zure interesekoa bada, baliteke beste gai hauek ere izatea
Osakidetza Bilbo Donostia Galdakao Bizkaia Gipuzkoa Araba Barakaldo Eusko Jaurlaritza ELA LAB Euskal Autonomia Erkidegoa Lana Gizartea Eguneko albisteak Gasteiz Albisteak Osasun albisteak Urduliz Sindikatuak Basurtuko ospitalea Gurutzetako ospitalea CCOO UGT Donostia Ospitalea Txagorritxu Ospitalea Koronabirusa ESK sindikatuaren azken ordukoa