Gizartea -
Koronabirusa
Araba, Bizkaia eta Gipuzkoako trenbide sarea sakonago desinfektatzen ari dira
Bilboko Zazpikaleetako metro geltokia garbitu dute goizaldean. Gipuzkoan, Anoetako eta Amarako geltokiak hasi dira garbitzen.
Agentzia | Erredakzioa
Tren azpiegiturak eta konboiak sakonago garbitzeko eta desinfektatzeko agindua eman du Eusko Jaurlaritzak, koronabirusari aurre egin nahian.
Euskotren, Metro Bilbao eta Euskal Trenbide Sarea Euskal Autonomia Erkidegoko trenbide eta tranbia sareko geltokien garbiketa indartzen hasi ziren ostiralean.
Aurreneko lanak Gasteizko eta Bilboko tranbiaren zenbait geltokitan aurrera eraman zituzten, Ekonomi Garapenerako eta Azpiegituretarako Sailak larunbat honetan jakitera eman duenez.
Bilboko Zazpikaleetako metro geltokia garbitu dute goizaldean, baita Kukullaga-Etxebarri eta Matiko-Bilbo arteko tartearen beste geltoki batzuk ere.
Gipuzkoan, Anoetako eta Amarako geltokiak hasi dira garbitzen, Topoaren Lasarte-Oria/Donostia/Hendaia linea, hain zuzen ere. Trenbide eta tranbia sareko desinfekzioa datorren astean areagotu eta amaituko dute.
