Lau adineko hil dira Bizkaiko egoitzetan COVID-19agatik, eta beste bat Gipuzkoan

Azken bi egunetan, lau adineko hil dira Bizkaiko egoitzetan. Koronabirus pandemiaren bigarren olatuan 62 adineko hil dira dagoeneko, Foru Aldundiak jakitera eman duenez.

Bizkaiko egoitzetan (155 zentro eta 10.748 pertsona hartzeko lekua), 86 adinekok eman dute positibo (duela bi egun baino hiru gehiago) eta 27 erabiltzaile ospitalean daude (bost gutxiago).

Egoitzetako langile kaltetuen kopuruak ere behera egin du azken bi egunetan: 101 gaixorik (bost gutxiago) eta 67 bakarturik (hiru gutxiago).

Egoitzetan edo ospitaleetan dauden adinekoez gain, beste 76 Bilboko Birjinetxe unitate espezializatuan daude; horietako 47 egoitzetako erabiltzaileak dira, eta 29 ospitalean egon ondoren koarentena egiten ari diren pertsona zaurgarriak.

Bizkaiko zortzi egoitzak dituzte adinekoak gaixorik: Leioa-IFAS (44), Zuetxe-Bakio (11), DomusVI Miraflores-Bilbo (9), Santa Maria-Getxo (6), Marcelo Gangoiti-Muskiz (6), Misericordia-Bilbao (5), Albiz Santiago Llanos-Sestao (3) eta San Jose Etxe Alai-Mungia (2).

Hildako bat Gipuzkoan; 24 jada bigarren olatuan

Bestalde, Gipuzkoako Foru Aldundiak jakitera eman duenez, Hernaniko Santa Maria Magdalena adinekoen egoitzan bizi zen pertsona bat hil da azken 48 orduetan COVID-19agatik. Horrekin, 24 dira jada pandemiaren bigarren olatuan erresidentzietan hildakoak.

Bestalde, Errenteriako Jesusen Bihotza erresidentziako bi egoiliarri alta epidemiologikoa eman diete, eta, horiek ere zenbatuta, 30 dira jada positibo eman ondoren sendatu diren Gipuzkoako erresidentzietako egoiliarrak.

COVID gaitza duten 46 pertsona daude gaur egun Gipuzkoako egoitzetan: 15 Hernaniko Santa Maria Magdalenan, 12 Errenteriako Jesusen Bihotzean, 7 Donostiako Alai-Etxen eta 12 Bergarako Mizpirualden.

Horietako 10 ospitaleratuta daude eta beste 25 Eibarko Ospitalean artatzen ari dira, Gipuzkoan kasu horiek artatzeko dagoen erreferentziazko zentroan.