Udaltzaingoak 60 zehapen-proposamen jarri ditu Gasteizko lokal batean

Gasteizko Udaltzaingoak 249 zehapen-proposamen jarri ditu guztira asteburuan, covid-19ari aurre egiteko araudia ez betetzeagatik; horietatik 60 Lasarteko ostalaritza-lokal batean jarri ditu.

Salaketa gehienak, 110, maskara ez eramateagatik edo gaizki erabiltzeagatik jarri zituzten, 52 segurtasun-distantzia ez gordetzeagatik, 30 bi metroko distantzia zaindu gabe erretzeagatik, 14 etxeratze-agindua ez errespetatzeagatik eta 14 sei pertsonako taldeko muga ez betetzeagatik.

Horiez gain, bost establezimenduren titularren kontrako salaketa proposamenak ere jarri zituen, arauak betetzen zirela ez zaintzeagatik: hiru ordutegiak ez betetzeagatik eta bi baimendutako edukiera gainditzeagatik.

Zigor gehien jartzea eragin zuen ustezko arau-haustea igandean izan zen, Lasarteko taberna batean. Agenteek 60 zigor proposamen jarri zituen: erdiak, maskara ez eramateagatik, eta beste erdiak, segurtasun distantzia errespetatu gabe erretzeagatik.

Larunbatean, baimendutako edukiera gainditzeagatik salatutako Foru kaleko establezimendu batean esku hartu zuen Udaltzaingoak. Bertan, 24 zehapen-proposamen egin zituen segurtasun-distantzia ez errespetatzeagatik eta beste 24 maskara ez erabiltzeagatik.

Egun berean, San Antonio kaleko ostalaritza-lokal batean esku hartu zuen Ertzaintzak. Agenteek urtebetetze festa bat aurkitu zuten, eta parte-hartzaileak "ez zeuden eserita eta sei pertsonatik gorako taldeetan zeuden". 55 pertsona zigortu zituzten, parte-hartzaileak eta lokaleko jabeak zenbatuta.