Verter Recyclingen aurkako auzi judiziala abian da, Zaldibarko luiziagatik

Durangoko Epaitegiak abian jarri du Verter Recyclingen eta enpresa horretako hiru arduradunen aurkako prozesu judiziala, Zaldibarreko zabortegian izandako luiziaren auzian. Ingurumenaren aurkako delituak leporatzen dizkiete.  

Ebazpenaren arabera, Jose Ignacio Barinaga Egia, Maria Arrate Bilbao Barinaga eta Juan Elosegui Etxebarria arduradunak eta konpainia bera ikerketapean mantentzea berretsi du epaitegiak.  

Prozesu judizial honetan hainbat akusazio partikular aurkeztu dira: Ekologistak Martxan taldea eta beste bi elkarte ekologista; Zaldibar, Elgeta, Eibar eta Ermuko udalak; Interbiak erakundea; eta Alberto Sololuze eta Joaquin Beltran langileen familiak.

Ekologistak Martxan taldeak ohar batean azpimarratu du auto honen bidez Zaldibarreko zabortegian  gertatutakoa argitzeko ikerketa judiziala hasi da. Gertakari "oso larriak" izan zirela erantsi du, "hondamendi ekologikoaz gain, bi langile hil zirelako".

Horrez gain, zabortegian izandako ezbeharrak eragindako "ingurumen krisiaren aurka" larunbat honetarako antolatu diren mobilizazioetan parte hartzeko deia egin dute. Datorren otsailaren 6an urtebete beteko da lurjausia izan zenetik eta egun horretan ere hainbat ekimen izango dira.

Urtebete geroago, erreskate taldeek Joaquin Beltranen gorpua bilatzeko lanetan ari dira oraindik. Alberto Sololuzeren gorpuzkiak joan den abuztuan topatu zituzten.