Azken egunetako joerari eusten dio EAEk, 487 kasu berri eta % 5eko positibitatearekin

Eusko Jaurlaritzako Osasun Sailak covid-19aren 487 kasu berri atzeman ditu ostiral honetan, aurreko egunean baino 18 gutxiago, eta positibotasun tasa hamarren bat igo da, % 5era iritsi arte. Halaber, EAEko ospitaleetan 146 gaixo daude, aurreko egunean baino hamar gutxiago.

Osasun Sailaren azken buletin epidemiologikoaren arabera, aurreko egunean 9.747 test diagnostiko egin ziren, aurreko eunean baino zerbait gutxixeago (10.234).

Lurraldeka, 70 positibo berri izan dira Araban (bezperan baino 3 gehiago), 301 Bizkaian (17 gehiago) eta 113 Gipuzkoan (36 gutxiago). Beste hiru kasu Euskal Autonomia Erkidegotik kanpo bizi diren pertsonei dagozkie.

53 ospitaleratze berri izan ziren, bestalde, ostiralean (ostegunean baino bat gutxiago), eta zainketa intentsiboetako unitateetan jarraitzen duten gaixoak 146ra jaitsi dira (24 ordu lehenago 156 ziren).

100.000 biztanleko 14 eguneko intzidentzia-tasa metatua (ostegunean 385,14 egunekoa zen), RO indizea eta udalerrien araberako informazioa ez dira astelehenera arte eguneratuko.

Nafarroako Foru Erkidegoko egoera

Nafarroako Gobernuaren Osasun Sailak 58 kasu positibo berri atzeman zituen atzo, hau da, aurreko egunean baino 7 gutxiago (65). 1.603 proba egin ziren, PCR eta antigenoen testen artean, eta positibotasun tasa % 3,6koa izan zen.

Datuak eskutan, Foru Erkidegoak 11 egunez daramatza, jarraian, egunero 100 kasutik behera izaten, eta 14 egun, jarraian, % 5etik beherako positibotasun tasa izaten.