Desgaitasuna duen familia baten etxegabetzea bertan behera utzi dute, Donostian

Kaleratzeak Stop plataformak jakinarazi du bertan behera geratu dela Donostiako Egia auzoko Aldakonean egin behar zuten etxegabetzea. Desgaitasuna duten ama-seme batzuk dira bertan bizi direnak.

Plataformak eskerrak eman dizkie mobilizazioetan parte hartu duten guztiei, plataforma sozialei eta ordezkari instituzionalei.

Gainera, azaldu du datozen egunetan iragarriko dutela Alkatetzarekin egingo duten batzarra. Bilera horretan "Kutxabankekin bermatuko da errenta zaharreko kontratu mugagabearen segurtasuna, zenbatekoa, eta ordaintzeko modua". Horrela, etorkizunean Kutxabankek salaketa jartzea galaraziko omen da.

Kaleratzeak Stopek atzo jakin zuen etxegabetzea bertan behera geratuko zela, eta zehaztu du defentsak aurkeztutako apelazio helegitea izapidetzea onartu delako izan dela.