Gizartea -
Agerraldia Frantzian
Salmonella, Caula Aliments enpresak ekoitzitako fuet batean
Alertarekin lotuta ez da kasurik baieztatu Espainian, baina Caula, Basso, Llorens, Zabaleta, Iki, Vima, El Andaluz, Casa Ramon, Spaña sol, Le Catalan eta Orgullo marketako fuetak merkatutik kentzeko agindua eman dute.
Agentziak | EiTB Media
Frantziak Espainiako Elikadura eta Nutrizio Segurtasun Agentziari (AESAN) salmonella agerraldi baten berri eman dio Europako Elikadura Alerta Sarearen (RASFF) bidez. Caula Aliments enpresak ekoitzitako fuet batek eragin du ustez agerraldia.
Kataluniako Osasun Publikoko Agentziak marka ezberdinetako (ASPCAT) fuetak merkatutik kentzeko agindua eman du, produktu-sailaren zenbakia kontuan hartu barik.
Alertarekin lotuta oraingoz ez da kasurik baieztatu Espainian, baina zerrendan jasotako produkturik etxean izanez gero, ez kontsumitzeko eta saltokira itzultzeko gomendioa eman dute.
Konkretuki, Caula, Basso, Llorens, Zabaleta, Iki, Vima, El Andaluz, Casa Ramon, Spaña sol, Le Catalan eta Orgullo marketako fuetak merkatutik kentzeko agindua eman dute. Caula, Basso, Llorens, Zabaleta, Iki eta Vima markek banatzen dituzte produktuak Espainian.
Caula Aliments bezeroekin harremanetan dago, merkatutik produktuak kentzeko. Hala ere, Frantziako agerraldiarekin lotutako produktuak ez dira Espainian saldu.
Kristal zatiak ahate gibel-orean
Gainera, erakunde berdinek beste alerta baten berri eman zuten asteartean. Rougie markako ahate foie grasean kristal zatiak agertu ziren, 2022/10/14 iraungitze-data duten potoetan.
Kontsumitzaileek abisua eman ondoren, ekoizleak produktua merkatutik kendu zuen. Konkretuki, Rougie markako 'Foie gras de canard entier du sud ouest' kristalezko potoetan saltzen da, eta 201014.103364 zenbakiko produktu-sailak izan du arazoa.