Itxi

2021/10/05

13:41

Gizartea

KORONABIRUSA

EAEk positibo berrien beheranzko joerari eutsi dio eta intzidentzia metatua 60ko langatik oso gertu dago

Naiara Ballesteros | EITB MEDIA

Euskal Autonomia Erkidegoak 92 positibo berri atzeman ditu, eta R0 indizeak gora egin du, batez ere Gipuzkoan, 1etik gorako muga gainditu baitu. Paziente kritikoen kopuruak, berriz, behera egiten jarraitzen du.

  • Hainbat pertsona Donostian

    Hainbat pertsona Donostian. Argazkia: EFE.

  • Whatsapp
  • Whatsapp
  • Telegram
  • Bidali

Euskal Autonomia Erkidegoak 92 positibo berri erregistratu ditu astearte honetan, bezperan baino 25 gehiago, baina beheranzko joerari eutsi dio, azken egunetako 100 kutsatzeen azpitik.

EAEn, covid-19aren intzidentzia-tasa metatua (100.000 biztanleko 14 egunekoa) 62,05ekoa izan da astearte honetan; ostiralean, berriz, 64,83 kasukoa zen, eta horrek esan nahi du nolabait moteldu egin dela kutsatzeen murrizketa.

Hala, astearte honetan ez da 60 kasuren datua lortu, kopuru horretatik behera birusaren transmisio moderatutik baxura igarotzen baita, eta hori da Bizi Berri IV Planak pandemia kontrolatzeko muga gehienak desaktibatzeko ezartzen duen muga, lokalen edukiera, ordutegia eta pertsona-taldeak murrizteko, besteak beste.

Hala ere, 60 kasuko kopuru horretara iritsi ez arren, litekeena da Eusko Jaurlaritzak gaur arratsaldean erabakitzea neurri murriztaile nagusiak ezabatzea Babes Zibileko Planaren Aholku Batzordean.

Intzidentzia metatuaren moteltzea hiru lurraldeetan ikusten da. Hala, Araban, 57,54 kasutik 57,24ra igaro da egun batean; Bizkaian, 58,05etik 56,13ra; eta Gipuzkoan, 68,85etik 68,71ra.

Osasun Sailak astelehen honetako datuekin argitaratutako azken buletin epidemiologikoaren arabera, positibotasun tasa (egindako proba diagnostikoen araberako kutsatzeen ehunekoa) % 1,7an dago, bezperan baino bi hamarren gutxiago, 5.327 test (1.725 gutxiago) egin ondoren.

92 positibo berri horietatik 44 Gipuzkoan atzeman dituzte (bezperan baino 7 gehiago), 35 Bizkaian (14 gehiago) eta 10 Araban (4 gehiago); beste 3 kasu Euskadin bizi ez diren pertsonenak dira.

Zure interesekoa izan daiteke baita ere: Irun berdez margotu da 

R0 indizeak (positibo batek zenbat pertsona kutsa ditzakeen adierazten du) hiru egun daramatza gora egiten eta 0,86an dago, aurreko eguneko 0,83aren aldean.

Azpimarratzekoa da parametro horrek Gipuzkoan izan duen igoera, 1etik gorakoa baitago (1,02); Araban, berriz, zazpi ehunen igo da (0,80); eta Bizkaian apur bat jaitsi da (0,77).

Ospitaleetako egoerari dagokionez, Bingen Zupiria Eusko Jaurlaritzako bozeramaileak prentsaurrekoan aurreratu duenez, Bizkaiko bi ospitaletan, Basurtukoan eta Santa Marinakoan, ez dago covid-19a duten gaixoen kasurik.

Buletin epidemiologikoak, akats informatiko bat dela medio, ez du argitaratu gela arruntetan ospitaleratutako pazienteen kopuru eguneratua, ezta ospitaleratze berriena ere, baina ZIUetan gaixo larrien kopuruak behera egin du, 34 pertsona baitaude, igandean baino 5 gutxiago.

Kontuan izan osasun agintariek koronabirusaren aurrean eman dituzten aholkuak. Gaitzaren sintomarik baduzu, EAEn bizi bazara, osasun-zentrora deitu, eta zalantzarik izatekotan, Osasun Batzordearen telefonoa duzu eskuragarri: 900 20 30 50. Nafarroan bizi bazara, berriz, Osasun Batzordearen telefonora dei dezakezu: 948 290 290. Gogoratu covid-19a ez hedatzeko modurik eraginkorrena musukoa erabiltzea, espazioak aireztatzea, segurtasun-distantzia gordetzea eta eskuak sarri garbitzea dela.
  • Bisitatuena

      Kargatzen ikusiena
      Kargatzen ikusiena
    ;