Gizartea -
Indarkeria matxista
Gizon bat atxilotu dute Laudion bikotekideari edalontzi batekin eraso egiteagatik
Ustezko erasotzailea epailearen esku geratu da azken orduetan. Emakumea Gurutzetako Ospitalera eraman behar izan zuten, zaurituta.
EITB MEDIA
Ertzaintzak gizon bat atxilotu zuen igande goizaldean Laudion (Araba) bikotekideari kristalezko edalontzi batekin eraso egiteagatik, Segurtasun Sailak Euskadi Irratiari baieztatu dioenez. Emakumea ospitalera eraman behar izan zuten, zaurituta.
Iturrion arabera, ustezko erasotzailea epailearen esku geratu da azken orduetan.
Eraso matxista igandeko 04:00ak aldera jazo zen, Zubiko Kuajo kalean. Gizonezkoak kristalezko edalontzi batekin kolpatu zuen emakumezkoa, buruan.
Larrialdietako zerbitzuak, Udaltzaingoa eta Ertzaintza bertaratu ondoren, biktima Gurutzetako Ospitalera eraman behar izan zuten zauriak artatzeko.
Laudioko Mugimendu Feministak erasoa salatu du eta "babes osoa" adierazi dio emakumeari. Twittereko euren kontuan nabarmendu dutenez, "horrelako erasoek ez dute gure herrian tokirik, ez Laudion ez inon. Sistema heteropatriarkalaren beste adibide garbi bat da hau, eta beraz, behin ere autodefentsa feministaren aldarria zabaltzeko beharra adierazi nahi dugu".