'Baimendutakotik haratago' joango direla ohartarazi dute suminduek

M-15 mugimenduaren lehen urteurrena ospatzeko antolatu dituzten ekitaldiek Gobernuak Madrilen duen ordezkaritzak jarritako ordu-muga gaindituko dutela ohartarazi dute suminduek.

Larunbaterako, hilak 12, deitu dituzte urteurrena ospatzeko ekitaldi gehienak, eta agintariek 22:00ak arteko epea jarri diete suminduei Madrilen, Solen, elkarretaratzea egiteko. 17:00etatik 22.00etara egin ahal izango dute elkarretaratzea larunbatean, eta 12:00etatik 22:00etara hurrengo egunetan.

Baimen horren arabera, gainera, Sol plazak oinezkoentzako duen espazioan bakarrik egon ahal izango dira suminduak, eta ezin izango dira inolaz ere ibilgailuen zirkulazioa eta metro zein tren geltokien sarrerak oztopatu.

Muga horien aurrean, baimendutakotik harantz joango direla ohartarazi du dagoeneko Soleko suminduen lantaldeak.

Beranduago bukatzeko asmoa dute

Kike Castello lantalde horretako kideak azaldu duenez, hilaren 12an, ezarritako ordutegia gaindituko dute, ekitaldiak 00:00etan amaitzeko asmoa baitute (gauerdian isiltasun oihu erraldoi batekin gogoratu nahi dute urteurrena).

"Beste kontu bat da pertsona bakoitzak indibidualki egiten duena'', azaldu du Castellok. ''Zer egingo dute 50.000 lagun biltzen badira bertan? Eta lau katu baldin bagara ere, bertatik botako gaituzte?'', galdetu du M15 mugimenduko kideak.

Istiluen kontrako 2.000 agente

Larunbat honetan istiluen kontrako 1.500 eta 2.000 agente inguru izango dira lanean Solen deitutako ekitaldiak direla-eta.