Beste 5 pertsona atxilotu dituzte Riau-riauko istiluengatik

Polizia Nazionalaren agenteek, Iruñeko Udaltzaingoaren laguntzarekin, bost pertsona atxilotu dituzte ustez aurtengo Riau-riaua ospatzea galarazteagatik. Uztailaren 9ko arratsaldean ospatu beharko litzatekeen ekitaldia bertan behera geratu zen hasi baino lehenago sortu ziren istiluengatik.

Atxilotutako bost pertsonak Iruñean jaiotakoak dira, eta hiruk aurrekari penalak dituzte, Nafarroako hiriburuko Udalak informatu duenez.

A.S.A inizialak dituen pertsona bat da lehen atxilotua. 1984an jaioa, 2007an terrorismoa goraipatzeagatik atxilotu zuten, eta hiru urte geroago, 2010ean, talde armatuko kide izatea leporatu zioten. Orain, istilu publikoak eta lesioak egotzi dizkiote.

1980an jaiotako R.I.S gizonari ere kargu bera leporatu diote. Horrek ere aurrekariak ditu, 1997an kalteak eragiteagatik atxilotu baitzuten.

Urte berean jaiotako J.I.Bri ere aurreko biei leporatutako kargu berdinak egotzi dizkiote.

Horiez gain, 1979an jaiotako M.A.S.P eta 1981ean jaiotako R.C.R atxilotu dituzte, eta biei desordena publikoak eragitea egotzi diete.

Istiluak

Gaurko operazio poliziala uztailaren 9an eta 10ean egindakoen jarraipen bat da. Egun horietan, ustez, sanferminetako Riau-riaua ospatzea galarazi zuten istiluekin zerikusia zuten lau pertsona atxilotu zituzten.