Twitter sare sozialaren blokeoa bertan behera utzi du Turkiak

Turkiak Twitter sare sozialari blokeoa kendu dio gaur, Estatuko Aldizkari Ofizialean Auzitegi Konstituzionalaren sententzia argitaratu ostean. Ixteko agindua legez kanpokotzat jo zuen epaiak asteazkenean.

Turkiako Telekomunikazio Zuzendaritzak webguneari blokeoa kendu dio gaur. Gobernuak sare soziala ixteko agindua eman zuen martxoaren 20an. Exekutiboaren aurkako ustelkeria akusazioak Twiterren zabaldu zituzten.

Epaia ahalik eta azkarren betetzea eskatu zuen bart Abdullah Gul Turkiako presidenteak. Era berean, Youtube bideoen atariari ezarritako blokeoa kentzea eskatu zuen, Radikal egunkariak jakitera eman duenez.

Gul blokeoaren aurka azaldu da beti, baita Twitterren bidalitako mezuen bidez ere. Sare soziala nabegaziorako tresna informatiko anonimoen bidez erabiltzeko aukera izan dute erabiltzaileek.

Youtube eta beste sare sozialak ixteko agindua justifikatu zuen lehen ministroaren bulegoak larunbatean, espioitzaren bidez lortutako goi-kargudunen informazioa zabaltzeagatik.