Mundua -
Gaza, erasopean
17.700 palestinar baino gehiago hil ditu Israelek Gazako Zerrendan erasoaldia hasi zuenetik
Azken 24 orduetan, 210 hildako eta 2.300 zauritu gehiago zenbatu dituzte, eta litekeena da datuek gora egiten jarraitzea, erasoek ez baitute etenik. Guztira 618 zauritu edo gaixo besterik ez dira atera Gazako Zerrendatik Rafahko pasabidetik azken bi hilabeteetan.
Agentziak | EITB Media
Gazako Zerrendako Osasun Ministerioak larunbat honetan jakinarazi duenez, Israelek ia 17.700 palestinar hil ditu duela bi hilabete Israelgo Defentsa Indarrek (FDI) hasitako erasoaldi militarraren ondorioz.
Hain zuzen ere, Gazako agintariek egin duten behin-behineko balantzearen arabera, guztira 17.700 gazatar hil eta 48.780 zauritu dituzte erasoetan. Azken 24 orduetan bakarrik, 210 hildako eta 2.300 zauritu gehiago zenbatu dituzte, eta litekeena da datuek gora egiten jarraitzea, erasoek ez baitute etenik.
Hamaseko agintariek, Nazio Batuek eta bertan dauden beste erakunde batzuek Israelgo indarrei leporatu diete Nazioarteko Zuzenbideak teorian babesten dituen eremu zibilak eta instalazioak bonbardatzea, ospitaleak eta eskolak tartean. Oldarraldi hori hasi zenetik, 618 zauritu edo gaixo besterik ez dira atera Gazako Zerrendatik Rafahko pasabidetik, Gazako Osasun Ministerioaren arabera.