'Diru-laguntzak ukatu dizkiete ETAgandik aldendu diren GALen biktimei'

Idoia Mendia PSE-EEren bozeramailearen esanetan, PPren gobernuak "indarkeriatik erabat aldendu diren" GALen biktimei diru-laguntzak kendu dizkie. Bere ustez, "hauteskunde interesei" begira diru-laguntzen gaia erabiltzen ari da Alderdi Popularra.

Jorge Fernández Díaz Barne ministroak GALeko 46 biktimari diru-laguntzak kentzea justifikatu duela izan du hizpide Mendiak. "ETAren mundukoak" izateagatik kendu dizkietela laguntzak esan zuen Fernandezek, eta Terrorismoaren Biktimen Aitortza eta Babes Integraleko Legeak jasotzen duenean oinarritu direla, indarkeriaz egindako delituen biktimen diru-laguntzarako hitzarmen europarrean.

Idoia Mendiak ziurtatu duenez, "GALen biktimak izateagatik diru-laguntzak jaso behar zituzten guztiak ez dira terroristak". Eta gaineratu du "Terrorismoaren Biktimen Lege berriaren arabera diru-laguntzak ukatu dizkietenetako batzuk  indarkeriatik erabat aldenduta dauden pertsonak direla ".

PSE-EEren bozeramaileak azaldu duenez, biktima horietako batzuk "urruneko senideak dira, edota politikoki ezker abertzaleko sigletako bati lotuta egon ziren". Baina ezker abertzalea legezkoa da gaur egun, eta herrialde honetan ez dute inor bere ideiengatik zigortu".

Hori dela eta, bere iritzian, "kontu handiz ibili behar da, gehien bat, berdintasunaren printzipioarekin".