Epaiketari hasiera emateko zitazioa jaso du Polok

Ignacio Polo Iruñeko Hiri Segurtasuneko zinegotzi ohia Probintzia Auzitegian izan da gaur, bere aurkako epaiketari hasiera emateko jakinarazpena jasotzen. Ustez alkohola edanda gidatzeagatik epaituko dute.

Apirilaren 21ean aurkeztu zuten dimisioa Polok, mozkortuta gidatzeagatik. Goizeko hamarretan agertu behar zuen Polok epaitegian, eta aurkeztu ezean, 200 eta 5.000 euro arteko isuna jaso zezakeen.

Zehaztutako ordua baino hamabost minutu lehenago agertu da Ignacio Polo Auzitegian. Bere semearekin joan da Justizia Jauregira eta kazetariei ez die adierazpenik egin.

Akreditazioa jaso ondoren segurtasun-kontrola igaro du eta abokatuarekin elkartu da. Harekin batera jaso du epaiketaren zitazioa.

Zitazioa jaso arren, ahozko epaiketak ez du datarik, Auzitegiak zinegotzi ohiak epaiketaren hasieraren aurka aurkeztutako helegitea argitu behar baitu lehenengo.