Politika -
Eusko Legebiltzarra
Cofelyren espediente bat Legebiltzarrera igortzea eskatu du PSEk
Patxi Lopezen Gobernuak ‘Punica’ Operazioan inplikatutako enpresarekin sinatutako kontratuaren espediente osoa Eusko Legebiltzarrari igortzea eskatu du Mendiak.
Erredakzioa
Aurreko Eusko Jaurlaritzak Cofely enpresarekin sinatutako kontratu osoaren espedientea Eusko Legebiltzarrari igortzeko eskakizuna erregistratu du Idoia Mendia PSE-EEko idazkari nagusiak. Cofely ‘Punica’ Operazioan inplikatutako konpainia da.
Udal eta erkidego ustelkeria sarea argitara eman zuen Guardia Zibilak eta Cofely energia zerbitzuen multinazionalak Bizkaiko Justizia eraikuntzen mantentze-lana lortu zuen 2010ean.
El Correo egunkariak gaur argitaratu duenez, Patxi Lopezen Gobernuko Justizia Sailak kontratua sinatu zuen. Mendia zen Justizia sailburua orduan.
Kontratuaren hasierako prezioak eta azkenean ordaindu zuten kopuruak Guardia Zibilaren arreta bereganatu zuten ikerketan; izan ere, erdia izan zen.
Jose Antonio Pastor PSE-EEko bozeramaileak agerraldia egin du. Pastorren ahotan, kontratu horretan “irregulartasunik izan ez” dela dio Poliziaren ikerketak.
Hala ere, “zalantza guztiak uxatzeko”, 2010eko abenduan esleitutako kontratuaren espediente osoa Legebiltzarrari igortzeko eskakizuna erregistratu du Mendiak, legebiltzarkide guztiek datuak berriz aztertu ahal izateko.
EH Bildu eta UPyD
Bestalde, kontratua aztertu ahal izateko informazio eskaera bat erregistratuko duela iragarri du gaur Gorka Maneiro UPyDko legebiltzarkideak.
Era berean, EH Bilduk eskakizun berdina erregistratu du Legebiltzarrean. Eusko Jaurlaritza “gaia ikertu barik uzteko tentaldian erori daiteke”, adierazi du Unai Urruzuno bozeramaile abertzaleak agiri batean.
