Juan Carlos Iriarte Perez ETAko ustezko kidea kartzelan sartu dute

Juan Carlos Iriarte Perez ETAko ustezko kidea Fresnesen kartzelaratu dute, Amnistiaren Aldeko Mugimenduak jakinarazi duenez.

Iriarte asteartean, ekainaren 1ean, atxilotu zuten Hendaian (Lapurdi), Frantziako Poliziak Guardia Zibilarekin batera burututako operazio baten baitan.

Atxiloketak "harremana izan lezake" iragan maiatzaren 20an Mikel Carrera ETAren arlo militarreko ustezko buruaren, Arkaitz Agirregabiria Carreraren ustezko oinordekoaren, Maite Aranalde ETAko ustezko kidearen eta Eñaut Aramendi ustezko laguntzailearen atxiloketekin, Rubalcabak adierazi zuenez.

Barne ministroak azaldu duenez, Iriarte izan liteke hiru atxilotu horiei Baionako Sargent Marcel Duhau kalean etxebizitza bat lortu ziena, eta orain ETAren eta erakunde armatuari dirua ematen diotenen artean bitartekari lanak egitea leporatzen diote.

Behin-behineko askatasuna

ETAko ustezko kidea behin-behineko askatasunean zegoen 2009ko abuztuaren 28tik, izan ere, Auzitegi Nazionalak auzipetu zuen 2006ko su-etenean desegin zuten ETAren ustezko mehatxu sarearekin lotuta.

Juan Carlos Iriarte donostiarra 1992an atxilotu zuen lehenengo aldiz Guardia Zibilak, ETAren "Leitzaran" taldeko kide izatea egotzita. Auzitegi Nazionalak sei urteko kartzela-zigorra ezarri zion horregatik.

2007ko urriaren 5ean Hendaian bertan atxilotu zuten autoan azkarregi gidatzen ari zela harrapatu zutenean. Frantziako Poliziak Iriarteren agiriak ikusi zituenean jakin zuen Espainiako Justiziaren estradizio eskaria zegoela, 2006an desegindako ustezko mehatxu sarearekin lotuta.

2008ko martxoaren 12an estraditatu zuten Espainiara eta abuztura arte preso izan zen, eta gero behin behineko askatasuna eskuratu zuen. Hendaiara joan zen bizitzera eta ordutik bertan bizi izan da arazo legalik gabe.