Politika -
Espioitza auzia
Ibarretxe ez zutela espiatu azpimarratu du CNIko zuzendariak
Diputatuen Kongresuan agerraldia egin du gaur eguerdian Sanz Roldanek, Ibarretxeren inguruko "espioitza" auzia eta Afganistanen inteligentzia zerbitzuek duten egoera azaltzeko.
Erredakzioa
Felix Sanz Roldan Espainiako Inteligentzia Zentroko (CNI) zuzendariak ukatu egin du inteligentzia zerbitzuek Juan Jose Ibarretxe lehendakari ohia espiatu izana, eta akusazio horiek egin zituen Herrizaingo Saileko langile ohiaren aurka salaketa aurkeztea aztertzen ari direla gaineratu du.
Diputatuen Kongresuan agerraldia egin du gaur eguerdian Sanz Roldanek, Ibarretxeren inguruko "espioitza" auzia eta Afganistanen inteligentzia zerbitzuek duten egoera azaltzeko.
Josu Erkoreka EAJk Kongresuan duen bozeramaileak urtarrilean eskatu zuen CNIren zuzendariaren agerraldia "EAJ eta Juan Jose Ibarretxe lehendakaria espiatu zituzten argitzeko", Gasteizko 4. zenbakiko Instrukzio Epaitegian Eusko Jaurlaritzako Herrizaingo Saileko funtzionario ohi batek egindako adierazpenen harira.
Erkorekaren ustez, "oso larria da" epaiketa horren lekukoak (El Tarta ezizenez ezagutua) epailearen aurrean esandakoa; horren arabera, EAJren gaineko informazioa ez ezik, "euskal agintari publiko gorenaren" gaineko informazioa ere pasatu zioten inteligentzia zentroari.
