Politika -
A28
Elkarrekin erabakiko dute EH Bilduk eta ERCk inbestiduran nola jokatu
Arnaldo Otegik esan du EH Bilduk ez diola "baldintza publikorik" ezarriko Pedro Sanchezi, baina aurreratu du ez dutela PSOEren eta Ciudadanosen arteko itunik onartuko.
AGENTZIAK | ERREDAKZIOA
EH Bilduk apirilaren 28ko hauteskunde orokorretan lortu duen emaitza "oso ona" dela azpimarratu du Arnaldo Otegi koordinatzaile nagusiak.
Otegik eta Marian Beitialarrangoitiak agerraldia egin dute Donostian atzoko emaitzen balorazioa egiteko, eta oso pozik azaldu dira; izan ere, koalizio subiranistak 258.840 boto eskuratu zituen Euskal Herrian, eta ordezkaritza bikoiztu du: lau diputatu izango ditu Kongresuan.
Otegik esan du EH Bildu eta ERC elkarrekin arituko direla Kongresuan "gai garrantzitsuak" jokoan daudenean, tartean Espainiako Gobernuko presidente berria hautatzeko prozesuan.
Ildo horretan, Otegik esan du Pedro Sanchezek zer egin nahi duen erabaki behar duela orain. EH Bilduk "baldintza publikorik" ezarriko ez diola adierazi du, baina PSOEk Ciudadanosekin ituna egitea erabakitzen badu, koalizio independentista "aurrez aurre" izango duela azpimarratu du.
Alderantziz, Sanchezek "benetako aldaketa" gauzatu nahi badu eta "Estatua demokratizatzeko prozesua" abiatu nahi badu, EH Bilduk "eskua luzatuko dio", agindu du.
"Arazo politikoak elkarrizketaren bidez eta akordio politikoak eginda konpontzen dira. Gu eredu sozioekonomikoaz, lurralde antolaketaz eta presoen auziaz akordioetara heltzeko prest gaude", esan du. "EH Bilduk arduraz baina irmotasunez jardungo du", erantsi du.
Horrez gain, EH Bilduk eta ERCk 19 parlamentariz osatutako talde parlamentarioa izango dutela nabarmen du. Otegiren ustez, "oso garrantzitsua" izango da hori, besteak beste, inbestidura bideratzeko elkarrizketetan edo Estatuko Aurrekontuak adosteko lanean elkarrekin arituko direlako.
