Politika -
EUSKADI IRRATIA
Aitor Esteban: "85 urteren ondoren lortu dugu Espainiako Gobernuak Gernikako bonbardaketa gaitzestea"
EAJk Diputatuen Kongresuan duen bozeramaileak uste du Ukrainatik datozen irudiak lagundu dutela gaitzespen adierazpena egitera.
9:34
EITB MEDIA
Espainiako Gobernuak "espresuki" gaitzetsi du Gernikako bonbardaketa, lehen aldiz. Aitor Esteban EAJk Diputatuen Kongresuan duen bozeramaileak Euskadi Irratian horren harira azaldu duenez, "aurrerapauso bat da; 85 urteren ondoren lortu dugu Espainiako Gobernuak Gernikako bonbardaketa gaitzestea".
Estebanen esanetan, alderdi jeltzaleak aspaldi egindako eskaerari erantzun dio Espainiako Gobernuak. "Ziur asko Ukrainatik datozen irudiak lagundu dutela gaitzespen adierazpen hori orain egitera", gaineratu du.
Hala ere, Estebanek kritikatu du gaitzespen horretan ez dela Espainiako Gobernu frankistaren erantzukizunik edo barkamen eskaerarik egin.
Bestalde, Pegasus auziaz galdetuta, arazo oso larria dela esan du EAJko bozeramaileak, eta adierazi du sekretu ofizialen batzordeak ez duela auzia konponduko, Espainiako "Gobernuak azalpen orokor batzuk emango dituelako bertan, eta, gauzak ukatu ostean, gero arte esango duelako".
