Urkullu atsekabetuta agertu da, baina harro "EAJk bere momentuan hartu zituen erabakiez"

Iñigo Urkullu lehendakaria ostiral honetan aritu da publikoki lehen aldiz De Miguel auziaren ebazpenaren gainean. "Atsekabea" duela adierazi du, zigortuak EAJko kideak zirelako, baina bere alderdiak izandako jardunbidea goraipatu du.

"Tristura dut zigortuen familiengatik eta hurbilekoengatik", esan du Urkulluk. "Harro nago, bestetik, Arabako diputatu nagusi ohia zen Xabier Agirrek eta EAJk bere momentuan hartu zituzten erabakiez; pentsatuz, gainera, EAJren izen ona zikindua izatearen arriskua zegoela".

Hala, haren ustez EAJk egoki jokatu zuela nabarmendu eta hartutako erabaki guztiekin kontzientzia "lasai" duela gaineratu du, gerora hartutako erabakiak ere "eredugarriak" izan direla gogoraraztearekin batera, horrelakoak kudeatzeko garaian.

Lasaitasun hori azpimarratu du lehendakariak, "errugabetasun zentzua eta hartu beharreko erabakiak uztartu nahi nituelako, mingarriak izan arren".

Era berean, pozik agertu da "bai Ertzaintzak, bai Eusko Jaurlaritzako zerbitzu juridikoek, baita Gobernantza Publikoko Sailak ere" hasieratik azaldutako jardunbidearekin.

"Ebazpena goraipagarria da", ondorioztatu du, "niretzat eta alderdia osatzen dugun milaka kideentzat". Bukatzeko adierazi duenez, "horrek erakusten digu zer den eta zer izaten jarraitu behar duen politikagintzak; herriaren zerbitzurako, gizartearen zerbitzurako aritzea. Euskadi da gure ondare amankomuna".