AHTaren lanetako hondeamakina bati su eman diote eta Ertzaintzaren aurkako pintaketak egin dituzte Errenterian

Josu Erkoreka Eusko Jaurlaritzako Segurtasun sailburuak adierazi du bart ezezagun batzuek Abiadura Handiko Trenaren obretako hondeamakina bat erre dutela Errenterian.

Sare sozialen bidez, Erkorekak kritikatu egin du ekintza hori, eta gaineratu duenez, haren ondoan dagoen obrako etxolan "pintada iraingarriak egin dizkiote Ertzaintzari, euskal poliziarekiko gorrotoaren diskurtsoa elikatzen duten hitzak".

Sailburuaren hitzetan, "gutxi batzuen intolerantziak Euskadiko errespetua eta bizikidetza kaltetu ditu" eta "lehengo garaietako ekintzak itzuli dira".

Horren aurrean, babesa eta elkartasuna adierazi dio Ertzaintzari, "Euskal Herritik jaiotako polizia kidegoari, Euskadiren askatasuna defendatzeko eta bermatzeko".