Politika -
EAEko hauteskundeak
Bakartxo Tejeria izango da jeltzaleen hautagaia Eusko Legebiltzarreko presidente izaten jarraitzeko
Joseba Egibar, berriz, ez da Gipuzkoako zerrendan izango, berak hala erabakita. Egibarrek amaitutzat eman dio, hala, Eusko Legebiltzarreko bere ibilbidea. Markel Olano, Gipuzkoako Ahaldun Nagusi ohia Gipuzkoako zerrendan izango dela ere jakin du EITBk.
EITB MEDIA
Euskadi Buru Batzarrak Bakartxo Tejeria proposatuko du Eusko Legebiltzarreko presidentegai izateko, EITBk jakin ahal izan duenez. Joseba Egibar, berriz, ez da Gipuzkoako zerrendan izango, berak hala erabakita. Hortaz, Egibarrek amaitutzat eman du Eusko Legebiltzarreko bere ibilbidea.
EAJko Euskadi Buru Batzarrak bilera du gaur arratsaldean Sabin Etxean Legebiltzarrerako datozen hauteskundeetan aurkeztu beharreko zerrendak zehazteko. Alderdiaren estatutuen arabera, zerrenden % 60 proposatzea dagokio zuzendaritzari.
Halaber, Markel Olano, Gipuzkoako Ahaldun Nagusi ohia ere Gipuzkoako zerrendan izango dela jakin du EITBk.
Hautagaitzak osatzeko barne prozesuak aurrera egin ahala erabakiko du EAJk zeintzuk izango diren Araba, Bizkaia eta Gipuzkoako zerrendaburuak. Gauza jakina da Bizkaikoa, Imanol Pradales, lehendakarigai ere badela Euskadi Buru Batzarrak proposatuta. Hala ere, militanteek berretsi beharko dute bere hautagaitza.