Politika -
Gernika
EH Bilduk Guggenheim Urdaibairi buruzko herri-galdeketa egitea jarri du baldintza bezala EAJrekin ituna ixteko
Koalizio subiranistako ordezkariek azpimarratu dutenez, bi indar politikoek proiektuaren inguruan "kontrako" jarrerak dituzten arren, beharrezkoa da "Gernika aurrera ateratzea".
EITB Media
Gernikako EH Bilduk Urdaibain Guggenheim museo bat eraikitzeari buruzko herri-galdeketa bat antolatzearen menpe jarri du Bizkaiko udalerrian EAJrekin ituna ixtea: "Galdeketa badago, akordioa egongo da".
Larunbatean, EAJrekin batera Jose Maria Gorroño Gernikako alkateari aginte-makila kentzeko zentsura-mozioa aurkezteko prest agertu zen EH Bildu. Gaur ohar batean adierazi duenez, Urdaibain Guggenheim museoa eraikitzea "marra gorria" da Bizkaiko EAJrentzat.
Koalizio subiranistaren arabera, horrek "desitxuratu" egin du bi indar politikoen arteko akordio baten negoziazioa, Gernikan gobernagarritasuna bermatzeko.
Hala ere, EH Bilduko ordezkariak "ziur" agertu dira akordioa "posible" dela, eta, beraz, blokeoaren "irtenbide" gisa, gobernu itunean herritarrei Guggenheim museoa eraikitzeko proiektuari buruzko kontsulta bat jasotzea proposatu dute.
Koalizioko ordezkariek azpimarratu dutenez, bi indar politikoek proiektuaren inguruan "kontrako" jarrerak dituzten arren, beharrezkoa da "Gernika aurrera ateratzea".