Otegik bi milioi boto eta 30 diputatu subiranista pilatu nahi ditu Estatu osoan

Arnaldo Otegi EH Bilduren koordinatzaile nagusiak "bi milioi botora eta 30 diputatura iristeko" deia egin du "inboluzioari aurre egiteko". Llotja del Mar-eko adierazpenaren sinatzaileekin (ERC, Junts per Cat eta Cup) batera pilatutako botoei eta diputatuei egin die erreferentzia.

Otegik EH Bilduren kanpaina itxierako ekitaldian parte hartu du gaur Iruñean, Labrit frontoian, eta bertan izan dira, era berean, Bel Pozueta Kongresurako zerrendaburu nafarra eta Joseba Asiron Udaleko bozeramailea ere.

Buruzagi abertzaleak azpimarratu du "jendea aktibatuta" dagoela, eta hori "oinarrizkoa" dela "emaitza ona eskuratzeko". Hala ere, adierazi du "bizitzan batzuetan irabazi" egiten dela, eta bestela "ikasi" egiten dela "helburuak lortzeko borrokan aurrera egiten".

EH Bilduren koordinatzaileak adierazi du "Estatuarena joera autoritarioa" dela, eta aste honetan "bi adibide" zan direla: "Estatu kolpe digitala Turkiako erara, eta alderdi independentistak legez kanpo uzteko lege proposamena Madrilgo Asanbladan". "Prestatzen ari direnaren bi seinale dira", ohartarazi du.

Otegik azpimarratu du helburua lortzeko bidea "Bartzelonatik, Santiagotik eta Iruñetik" igarotzen dela, eta hori dela "frankismoaren herentziari gailenduko zaion bidea".