Aieten ETAren biktimen omenezko zentroa eraikitzea proposatu du UPyDk

Nicolas de Miguel Donostiako Udalerako UPyDk aurkeztu duen hautagaiak Donostiako Aiete Jauregian "ETAren terrorismoaren biktimen omenezko zentro bat" eraikitzea proposatu du, bere alderdiak ez duelako "memorian hutsunerik" eta gai horretan "argiak" izango direla azpimarratu du, izan ere, hiriak "azken 80 urteetan ez du askatasunik bizi izan, Francoren diktadura izan zen lehenengo eta ETAren terrorismoa etorri zen gero".

Donostian egindako hauteskunde-ekitaldi batean Gorka Maneirorekin batera egin duen agerraldian De Miguelek azaldu duenez, haien apustua "herritar errealen elkarbizitza, hirigunean TAOa banatzeko dauden arazoak konpontzea, bidegorriak zentzuz jartzea eta animaliak jabeekin lasai ibiltzeko eremuaren mapa osatzea" izango da.

Finean, De Miguelek esan du helburua "Donostia hiri tolerante eta ireki" bihurtzea da, "beti izan baitira horiek Donostiaren ezaugarri nagusiak".