Arabako Batzar Nagusiak, isunaren %70a Jaurlaritzak ordaintzearen alde

Arabako Batzar Nagusiek, PP, EH Bildu eta EB alderdien botoekin, opor fiskalengatik ezarritako isunaren % 70a Eusko Jaurlaritzak bere gain hartzea eskatu dute asteazken honetan. Gainerako % 30a ordaintzeko lurralde horri ez kaltetzeko formula bat bilatzearen alde ere egin dute.

Arabako Batzar Nagusiek transakzio-zuzenketa bat onartu dute gaur, PPk, EH Bilduk eta EBk sinatuta. PSE-EEk errefusatu egin du, eta EAJ abstenitu egin da.

Ekimenaren lehen puntuak Javier de Andres Arabako ahaldun nagusiak mantentzen duen jarrera berretsi du, isunaren ordainketari nola aurre egin behar zaion esateko orduan.

De Andresek isunaren % 70a Eusko Jaurlaritzak ordaintzea eskatu du, eta gainerako % 30a hiru foru erakundeek sartzea, Ekarpen Legeak markatutako koefizienteen arabera: Arabaren kasuan % 16,6, Gipuzkoarenean % 33, eta Bizkaiarenean % 50.

Arabako Batzar Nagusiek onartutako testuan jarrera hori babesten da, eta formula "orekatu" bat bilatzeko eskaera ere egiten da, hiru aldundien artean gainerako % 30a ordaintzeko modua erabakitzeko.

Irtenbide bat bilatzea, "herrialdearen gakoa"

Batzar Nagusien osoko bilkuran, Gorka Ortiz de Guinea Bilduko bozeramaileak "herrialdearen gakoan" irtenbide bat bilatzea eskatu du. "Administrazio bat bera ere oso kaltetuta ez irtetea"ren alde ere egin du.

Arabako Batzar Nagusiek onartutako testuaren bigarren puntuan, "araudian erantzukizuna eta zerga-koordinazioa duten erakundeek ezarritako multa eragin duten legez kanpoko laguntzak berreskuratzeko atzeraldian erantzukizuna onartzea" eskatzen da.

EH Bilduren jatorriko zuzenketa urrunago zihoan, erantzukizun politikoak onartzea eskatzen zuelako "berreskuratzeko foru aldundien jarrera oztopatzaileagatik".

PSE-EEtik azaldu dutenez, alderdiak transakzio-zuzenketaren aurka egin du, erantzukizunek izena dutela uste duelako, eta erakundeetan erori behar ez direlako, gaineratu du.

Halaber, Espainiako Gobernuaren isunaren zati bat bere gain hartu behar duela uste dute sozialistek.

EAJ abstenitu egin da, haren ustez, Finantzen Euskal Kontseiluak izan behar duelako ehunekoak erabakitzen diren lekua.