Itxi

Ekonomia

KORONABIRUSA

Jende andana atera da kalera ostalaritzaren alde

EITB.EUS

17:30ean abiatu dira martxak Donostian, Gasteizen, Iruñean eta Bilbon. Gainera, elkarretaratzeak egin dituzte beste hainbat herritan ere, ostalaritza babesteko laguntzak eskatzeko.

1:46
Ostalarien manifestazioa Bilbon.

Milaka pertsona atera dira kalera larunbat arratsalde honetan Hego Euskal Herriko lau hiriburuetan, SOS Ostalaritza plataformako kideek deituta, ostalaritza sektorea "desagertzeko arriskuan" dagoela salatzeko eta sektoreari berehalako laguntzak emateko eskatzeko. Deitzaileek Eusko Jaurlaritzak "bat-batean" eta "inolako laguntzarik eman gabe" itxi duela ostalaritza salatu dute.

Mobilizazioak 17:30ean abiatu dira martxak Donostiako Boulevard zumarditik, Gasteizko Bilbo plazatik, Iruñeko Gazteluko plazatik eta Bilboko Moyua plazatik. Gainera, elkarretaratzeak egin dituzte beste hainbat herritan, Arrasaten, Azpeitian, Lasarten, Amurrion eta Laudion, esate baterako.

COVID-19aren krisiak gehien astindutako sektoreetako bat da ostalaritza. SEA Ostalaritza, Bizkaiko Ostalarien Elkartea eta Gipuzkoako Ostalaritzako presidenteek azpimarratu dutenez, sektoreak 60.000 lanpostu ditu, eta "% 25 desagertuko dira erreskate neurriak berehala martxan jarri ezean".

Azken orduetan, "premiazko erreskatea" eskatu diote ostalariek Eusko Jaurlaritzari, eta horretarako, 187 milioi euroko laguntza zuzenak eskatu dituzte. Atzo, Javier Azpiazu Ekonomia sailburuak, ETBn egindako elkarrizketan, esan zuen "diru asko" dela ostalariek eskatzen dutena.

EiTBk jakin ahal izan duenez, Jon Hurtado Jaurlaritzako Merkataritza sailburuak bilera telematikoa egin du ostalarien ordezkariekin goizean, baina ez da ezagutzera eman adostasunik lortu ote duten.

Protestekin bat egin du LAB sindikatuak eta ELAk ere ostalaritzan premiaz esku hartzea eskatu du.

Bilboko protestaren kasuan, dozenaka furgoneta eta hornitzaileen kamioiak buru zituela hasi da manifestazioa, 'SOS Ostalaritza' zioen pankarta baten atzean. Bizkaiko Ostalaritza Elkarteak  "aldarrikapenetan irmotasuna eta erantzukizuna" eskatu die parte-hartzaileei, talde negazionistak infiltratzen eta istiluak sortzen saiatu zitezkeelakoan. 'Ostalaritza aurrera' oihuen artean, normaltasunez egin dute martxa, Ertzaintzak zorrotz zainduta. Manifestazioaren amaieran, antolatzaileek ohar bat irakurri dute hartutako neurrien ondorioz establezimendu asko betirako itxi dituztela ohartarazteko.

"Badakigu osasun egoera larria dela eta neurriak hartu behar direla, baina ez dugu murrizketen gogortasuna ulertzen. Gaueko aisialdiak hilabeteak daramatza geldirik eta birusak hedatzen jarraitzen du", adierazi dute. Tabernak "seguruak" direla defendatu ostean, Jaurlaritzak hartutako neurriekin batera sektoreari laguntzeko neurriak hartu behar direla esan dute.

Hori dela eta, besteak beste, alokairuak jaistea eta hipotekak atzeratzea eskatu dute, baita presio fiskala jaistea ere, eta BEZa aldi baterako % 4ra jaistea. "Zero sarrera, zero gastua. Dirua badago, non erabili nahi duten zehaztea baino ez da falta. Ez da AHTaren garaia, ezta politikariek soldata igotzeko unea ere ", gaineratu dute.

Gasteizko kasuan, ehunka lagun bildu dira manifestazioan. Komunikabideen aurrean egindako adierazpenetan, plataformako bozeramaile batek, Iñigo Ortizek, Administrazioaren erabakiek sektorean sortu duten "babesgabetasuna" salatu du. Gainera, ostalariek ez dutela inbertsioetarako pizgarririk nahi adierazi du, baizik eta administrazioek "laguntza zuzenak" ematea koronabirusaren krisiak eragindako galerak konpentsatzeko.

Ortizek laguntza horiek azkar banatzea eskatu du, ostalariek dagoeneko ez baitute pandemiaren lehen faseari aurre egiteko izan zuten "koltxoi ekonomikorik". Hori dela eta, sektorea babesten ez bada, "negozio asko desagertuko" direla ohartarazi du.

Donostian, milaka pertsonak bat egin dute manifestazioarekin eta hiriko erdiguneko kaleak zeharkatu dituzte. Hasi eta ia ordubetera, jendea irteten ari zen irteera-puntutik. Manifestariek txalo artean egin dute ibilbidea, eta "ez dago zergarik diru-sarrerarik gabe", "jo ta ke, irabazi arte", "Langileak gara, ez gaizkileak" eta "zuk ixten banauzu, zuk ordaindu behar duzu" bezalako leloak oihukatu dituzte.

Marian Beitialarrangoitia, Nerea Kortajarena, Reyes Carrere eta Juan Karlos Izagirre EH Bilduko ordezkariek bat egin dute manifestazioarekin.

Manifestazioa hasi baino lehen, deitzaileek manifestazioaren izaera baketsua azpimarratu dute, eta, ibilbidean zehar, manifestarietako bati petardoak bota izana aurpegiratu diote.

Ostalariek manifestu bat irakurri dute, eta erakundeen "babesik gabe" sentitzen direla esan dute. Zentzu horretan, "BEZaren jaitsiera, udal tasak kentzea eta autonomoen kuota ez igotzea" eskatu dute.

Iruñean, Nafarroako ostalari talde batek elkarretaratzea egin du larunbat honetan, Iruñeko Gaztelu Plazan, "sektorearen egoerarekin bat datorren erreskate plan berehalako eta benetakoa" eskatzeko. Elkarretaratzean irakurritako adierazpenean, ostalariek "sektoreari buruz eman den irudi txarra garbitzeko" eskatu dute, "gizarteari ikusaraziz konponbidean lagundu dezakegula eta ez garela arazoa".

Udalei malgutasuna eskatzen diete terrazak emateko, ordutegietarako eta horien erabilerarako irizpideekin, eta gaur egun gauez bakarrik lan egin dezaketen lokalen lizentziak emateko. Gainera, mankomunitateei zorrak barkatzeko eskatzen diete, itxierek irauten duten bitartean, eta Nafarroako Gobernuari, berriz, edozein itxiera partzial edo erabatekoa aldez aurretik jakinarazteko, beharrezko lan-plangintza errazteko eta genero-galera murrizteko.

Era berean, eskatzen dute ERTEko langileek nominaren % 100 jasotzea eta autonomoen laguntza % 100era handitzea, eta negozioaren alokairuen eta maileguen ordainketa geldiaraztea eta handitzea, baita energia-enpresekin egindako kontratuak berrikustea eta, pandemiak irauten duen bitartean, zergak ez igotzea ere.

Diru-laguntzetan, 25 milioi gehiago

Ostalarientzako zuzeneko diru-laguntzak areagotu ditu Eusko Jaurlaritzak. 45 milioi euro bideratuko ditu Exekutiboak, 25 milioi gehiago, alegia. Bestalde, Elkargi elkartearen bidez 100 milioiko finantziazio espezifikoa prestatzen ari da.

Diru-laguntza berriak datorren asteartean onartuko ditu Gobernu Kontseiluak, “osasun neurri berriek kaltetutako pertsonak eta enpresak berehala laguntzeko”.

Horrela, zuzeneko diru-laguntzak 45 milioira helduko dira; izan ere, 25 milioi gehiago bideratuko dituzte. Hasiera batean, 20 milioi jarri zituzten mahai gainean.

Gainera, finantziazio ildo espezifiko bati forma ematen ari dira (interes txikiko maileguak), 100 milioi Elkargiren bidez.

Azkenik, diru-laguntza guztien tramitazioa azkartzeko, Eusko Jaurlaritzak COVID-19 premiazko kudeaketa Unitatea sortuko du, laguntzak urtea bukatu baino lehen gauzatzeko.

Protestak Ipar Euskal Herrian ere

Hegoaldean bakarrik ez, Ipar Euskal Herrian ere protestak deitu dituzte gaurko, bertan ezarrita dagoen konfinamenduak horretarako baimenik ematen ez duen arren.

Batetik, Donibane Garazi eta Baigorriko merkatari eta artisauek 13:00etan egin dute protesta saltoki handiak izaten ari diren trataera bera aldarrikatzeko. Izan ere,  saltoki txikiak itxita dauden bitartean, saltoki handiei irekita egoteko baimena eman diete.

Bestetik, konfinamenduaren kontrako protestak egingo dituzte hainbat herritan; Hendaian, esaterako, arratsaldeko 16:00etan izan da hitzordua; eta 17:00etan, Sarako Herriko Etxean. 

  • Bisitatuena

      Kargatzen ikusiena
      Kargatzen ikusiena