Atmosferaren kutsadurak 42.000 heriotza eragiten ditu urtean Frantzian

Atmosferaren kutsadurak 42.000 heriotza eragiten ditu urtean Frantzian, eta, gainera, 100.000 milioi euroko kostu ekonomikoa dakar, hots, 1.100-1.600 eurokoa biztanleko, herrialde horretako Senatuaren ikerketa baten arabera.

Goi Ganberak 60 aholku adostu ditu, hala nola gasolioaren zergak gasolinak dituenekin parekatzea (egun, dieselak tasa txikiagoak ditu), autobus elektrikoak ekoizteko industria bat sortzea eta kutsaduraren alorrean lege argiak ezartzea.

Kutsadura, Parisen. Argazkia: EiTB

Hori horrela, Ekologia Ministerioak iragarri du urtarrilean "koloredun etiketen sistema bat" abiatuko duela, gehien kutsatzen duten ibilgailuak identifikatu eta horien zirkulazioa mugatzeko.

Parisek aurrea hartu du, eta zirkulatzea guztiz debekatu die gehien kutsatzen duten autobus eta kamioiei. Gainera, gasolioz dabiltzan ibilgailuak debekatzeko egutegi bat ezarri du.