Barakaldoko sexu-erasoaren beste bi ustezko egileak Fiskaltzaren aurrera agertu dira

Pasa den abenduaren 29an Barakaldon adin txikiko bati egindako sexu-erasoaren kasuan, oraindik aske jarraitzen zuten ustezko lau erasotzaileetako bi Bilboko Adingabeen Fiskaltzaren aurrera agertu dira gaur goizean. Neskatoak salatu zuenez, lau mutikok sexu-erasoa egin zioten. Gerora, Ertzaintzak lau pertsona identifikatu zituen.

Asteazkenean beste bi ustezko erasotzaileak euren kabuz joan ziren Bilboko Adingabeen Fiskaltzara, eta deklaratu ostean Zumarragako adingabeen zentrora eraman zituzten.

Sexu-erasoa joan den ostiralean gertatu zen Barakaldoko Carmengo trasteleku batean. Neskak Udaltzaingoari deitu zion, eta bi udaltzain bertaratu zirenean, biktima "zeharo hunkituta" aurkitu zuten. Adin txikikoak jarritako salaketaren ondotik, Ertzaintzak ikerketa abiatu zuen eta lau gazte identifikatu zituen erasoarekin lotura zutelakoan.

Azkenean, beraz, identifikatutako lau gazteak beren kabuz aurkeztu dira Fiskaltzaren aurrera.

________________________________

Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak edota deitu telefono hauetako batera: 900 840 111 (Euskadin) edo 016 (Estatu osoan); doakoak dira eta ez dute arrastorik uzten fakturan.