Publizitatea
Itxi

2020/10/15

18:26

Gizartea

KORONABIRUSA

679 kasu gehiago atzeman dituzte EAEn eta 444 Nafarroan

eitb.eus

Positiboen tasa % 6,2ra igo da Euskadin (PCR gehiago egin dira), eta Nafarroak 400 kasuak gainditu ditu berriro egun batean; horrek esan nahi du positiboen tasa % 12,6koa dela.

  • Koronabirusaren laborategia

    Koronabirusaren laborategia. Argazkia: EFE.

  • Whatsapp
  • Whatsapp
  • Telegram
  • Bidali

Euskal Autonomia Erkidegoak 679 kutsatu berri zenbatu ditu azken 24 orduetan COVID-19aren ondorioz, eta positiboen tasak gora egin du berriro. Gainera, azken 24 orduetan 35 pertsona ospitaleratu dituzte eta 51 gaixo egon dira zainketa intentsiboetako unitatean.

Eusko Jaurlaritzako Osasun Sailak jakitera eman duenez, atzo, asteazkena, 10.890 PCR proba egin zituzten, asteartean baino gehiago, eta 679 kutsatze berri atzeman dituzte, aurreko egunean baino 269 kasu gehiago.

Horrela, positiboen tasa % 5,5etik % 6,2ra igo da 24 orduan, eta sei egunez jarraian % 5etik gora mantendu da; hortik aurrera talde transmisioa dagoela uste da.

Datuak lurraldez lurralde aztertuta, kutsatze guztietatik 77 Araban atzeman dituzte, aurreko egunean atzemandako 39ak baino gehiago, eta horietatik 62 Gasteizen.

Bizkaian ere, gora egin du kutsatzeen kopuruak, 291ra, asteartean 179 izan baitziren. Bilbok 85 positibo berri zenbatu ditu, Barakaldok 27, Getxok 22 eta Durangok 19.

Gipuzkoan, 303 kutsatu atzeman zituzten atzo, eta 186 izan ziren bezperan. Donostiak 82 kutsatze berri atzeman ditu, Irunek 22, Errenteriak 18, eta Lasarte-Oriak eta Tolosak 12.

Halaber, EAEtik kanpo bizi diren zortzi pertsonak eman dute positibo EAEn egindako probetan, aurreko egunean baino bi gehiagok.

EAEn, 35 pertsona ospitaleratu dituzte, aurreko egunean baino bi gehiago. 51 gaixo daude zainketa intentsiboetako unitateetan, asteartean baino bat gehiago. Guztira, 273 gaixo daude (10 gehiago) COVID-19arekin EAEko ospitaleetan.

Zifra horiekin, 100.000 biztanleko 14 egunean metatutako intzidentzia-tasa 286,79koa da Euskadin, eta intzidentzia-tasen arrazoia (egungo 14 egunetan metatutako intzidentzia-tasa duela astebetekoarekin alderatzen duena) 1 baino handiagoa da (zehazki, 1,17); horrek adierazten du intzidentziak gora egin duela.

Lurraldez lurralde aztertuta, tasarik altuena Gipuzkoari dagokio (354,71), Arabak 249,42ko tasa du eta Bizkaiak txikiena (244,65).

Adinaren arabera, Euskadin, kasu berrietatik 262 40 eta 64 urte artekoei dagozkie, eta 175, 19 eta 39 urte artekoei. 18 urte arteko populazioan 121 kasu gertatu dira, 65 eta 79 urte bitarteko tartean 76 kasu, eta 80tik aurrera beste 40 kasu positibo atzeman dituzte.

100.000 biztanleko 14 eguneko intzidentzia-tasa metatu handiena 19 eta 39 urte bitarteko biztanleei dagokie, 340,7ko tasarekin; txikiena, berriz, 65 eta 79 urte bitarteko biztanleei dagokie, 175eko tasarekin.

Oinarrizko ugalketa-kopurua, kasu positibo bakoitzak zenbat pertsona kutsatzen dituen neurtzen duena, 1,17koa izan da azken orduetan Euskadi osoan.

Euskadiko intzidentzia epidemiologikoari buruzko bilakaera hemen kontsulta daiteke. Azken orduetan herriz herri zenbatutako positibo berriak azter daitezke, eta pandemia hasieratik atzemandako kasu guztiak eta adin taldeen araberako datuak ageri dira bertan.

Ostegun honetan, 109 ikasgela itxi dituzte Euskadin, COVID-19aren kasu positiboren bat izateagatik (joan den asteazkenean baino 21 gutxiago), hau da, ikasturte honetan 2 urtetik derrigorrezko hezkuntza ez unibertsitariora arte dauden eskolen % 0,62.

Nafarroak 400 kasuak gainditu ditu berriro egun batean

Nafarroako Osasun Publikoaren Institutuak emandako datuen arabera, COVID-19aren birusak eragindako 444 kasu positibo berri zenbatu zituzten atzo, osasun sistema publikoan 3.519 PCR proba egin ostean; horietatik, % 12,6 positiboak izan ziren. Kasu berrien % 67 Iruñean eta Eskualdean daude.

Atzo, gaixotasun horrekin lotutako 18 ospitaleratze berri izan ziren Nafarroako ospitaleetan, horietatik 4 zainketa intentsiboetako unitateetan. Atzo, 5 hildako izan ziren Nafarroan, 83, 84, 91, 92 eta 94 urteko pertsonak; beraz, COVID-19ak guztira 632 heriotza eragin ditu jada Foru Erkidegoan.

Zonaldeka, Iruñean eta Iruñerrian positiboen % 67 erregistratu dira, Tuteran % 15 eta Lizarran % 4. Gainerako positiboak (% 14) Nafarroako beste eremu batzuetan banatzen dira.

Erregistratutako kasuen banaketari dagokionez, adin-tarteen arabera, talde nagusiak 45 eta 59 urte artekoak (% 24) eta 30 eta 44 urte artekoak (% 20) dira. Ondoren, 60 eta 75 urte bitartekoak eta 15 eta 29 urte bitartekoak daude, biak % 18rekin, eta, azkenik, 15 urtetik beherakoak daude, % 13rekin eta 75 urtetik gorakoak, % 7rekin. Kasu berrien batez besteko adina 42,5 urtekoa da.

Generoari dagokionez, % 52 emakumeak dira eta % 48 gizonak.

Nafarroako ospitale-sarean 272 pertsona daude ospitaleratuta COVID-19arekin, horietatik 35 zainketa intentsiboetako unitateetan eta beste 42 etxean. Gainerakoak, 195 gaixo, gela arruntetan daude.

Birusak eragindako infekzioen intzidentzia-metatuari dagokionez, atzoko kasuak batuz gero, gaur egun 23.456 dira Nafarroan kutsatutakoak.

Ildo horretan, "ospitaleetako presioaren gorakada argia dela" esan du Santos Indurain Osasun kontseilariak.

Hildako bat eta hiru positibo Bizkaiko eta Gipuzkoako egoitzetan

Bestalde, Bizkaiko adinekoentzako zentroetan bizi zen pertsona bat hil da azken bi egunetan, eta kutsatutako adinekoen kopurua jaitsi egin da.

Foru Aldundiak jakitera eman duenez, dagoeneko 74 pertsona hil dira Bizkaian pandemiaren bigarren olatuan.

Azken bi egunetako datuen arabera, Bizkaiko egoitzetan kaltetutakoen kopuruak behera egin du; izan ere, 35 erabiltzaile daude koronabirusak jota, hamahiru gutxiago, alegia, eta beste 14 ospitaleratuta daude, duela bi egun baino bi gutxiago.

Horrez gain, erresidentzietako 63 langile daude kutsatuta eta beste 55 bakartuta.

Bestalde, Gipuzkoako egoitzetan hiru positibo izan dira azken orduetan. Hiru kutsatze horiek Donostiako Berra egoitzan detektatu dituzte.  

Bestalde, Bergarako Mizpirualden bizi diren bi lagunek eta Hernaniko Santa Maria Magdalenan bizi diren lau lagunek gainditu dute gaixotasuna. Beraz, 62 pertsonak jaso dute alta epidemiologikoa.

Egun, Gipuzkoako sei egoitzatan daude COVID-19 kasuak: Hernaniko Santa Maria Magdalenan (4), Errenteriako Jesusen Bihotzan (2), Donostiako Alai-Etxen (25), Bergarako Mizpirualden (11), La Pazen (1) eta Donostiako Berran (4).

Guztira, 47 kasu positibo izan dira Gipuzkoako zentroetan, eta, bigarren olatuan, 33 pertsona hil dira eta 62 lagunek gainditu dute gaixotasuna.

Egun, zazpi pertsona daude ospitaleratuta, eta beste 35 Eibarko Ospitaleko gizarte solairuan daude ingresatuta.

14 pertsonak gainditu dute gaixotasuna Arabako egoitzetan

Bestalde, Arabako egoitzetako 14 erabiltzailek gainditu dute koronabirusa azken egunotan, eta, beraz, sendatu direnen kopurua 137ra igo da.

Hain zuzen ere, Colisée Miñao eta Okon Andre Mariaren egoitzetan (Bernedo) koronabirusarekin gaixorik zeuden erabiltzaile guztiak sendatu dira.

Halaber, Agure Arkaiate eta Florida Etxea etxebizitza komunitario pribatuetan bizi diren beste bederatzi pertsonak ere gainditu dute gaitza.

Arabako lau zahar-etxetan daude kasu positiboak.

Kontuan izan osasun agintariek koronabirusaren aurrean eman dituzten aholkuak. Albiste faltsuak zabaldu dira; beraz, agintariek emandakoei bakarrik egin kasu. Gaitzaren sintomarik baduzu eta EAEn bizi bazara, osasun-zentrora deitu, eta zalantzarik izatekotan, Osasun Batzordearen telefonoa duzu eskuragarri: 900 20 30 50. Nafarroan bizi bazara, berriz, Osasun Batzordearen telefonora dei dezakezu: 948 290 290. Gogoratu COVID-19a ez hedatzeko modurik eraginkorrena eskuak sarri garbitzea dela. Ahoa estaltzeko maskarak derrigorrezkoak dira EAEn eta Nafarroan. Iparraldean, "espazio publiko itxietan" da derrigorrezkoa, baita Lapurdiko herri eta hiri nagusietan ere.
  • Bisitatuena

      Kargatzen ikusiena
      Kargatzen ikusiena