Itxi

Gizartea

Koronabirusa

Positibotasun tasa % 6,8 eta % 9,2ra igo da EAEn eta Nafarroan

agentziak

Euskadik beherakada txiki bat izan du, 499 kasu positibo atzeman baititu azken orduetan, eta Nafarroak igoera txiki bat izan du, 112 pertsona gehiago kutsatu baitira.

1:19
Positibo tasa. Grafikoa: EiTB

EAEn eta Nafarroan positibotasun tasa igo egin da, igande honetan egindako koronabirusaren test diagnostikoetatik lortutako emaitzen ondorioz.

Euskadik 499 positibo berri atzeman zituen iragan igandean koronabirusaren ondorioz, aurreko egunean baino 119 gutxiago, baina positibotasun tasa apur bat igo da, % 6,8ra arte. Laugarren egunez jarraian % 7tik behera jarraitzen du. Joan den urriaren erdialdeko ehunekoaren antzekoa da, eta horrek baieztatu egiten du COVID-19aren intzidentzia egonkortu egin dela murrizketak gogortu eta 15 egunera; horien artean, ostalaritzaren itxiera.

Osasun Sailak astelehen honetan argitaratu duen buletinaren arabera, iragan igandean 7.290 PCR eta antigeno proba egin zituzten, aurreko eguneko 9.616 proben azpitik. Horietatik, 499 positiboak izan dira, eta larunbatean 618 izan ziren; beraz, positiboen tasa % 6,4tik % 6,8ra igo da.

Gainera, 100.000 biztanleko 14 egunetan metatutako intzidentzia-tasak behera egiten jarraitzen du, eta 668,60koa da.

EAEko erietxeetan 22 gaixo ospitaleratu zituzten igande honetan, hau da, aurreko balantzean baino lau gutxiago; zainketa intentsiboetako unitateetan, berriz, 141 pertsona daude ospitaleratuta, lau gehiago.

Hala, Euskadiko erietxeetan 590 pertsona ospitaleratu dituzte guztira, zainketa intentsiboetako 141 paziente barne, hau da, larunbatean baino 12 gehiago.

Gaixo batek zenbat pertsona infektatu ditzakeen zehazten duen oinarrizko ugalketa-indizeak egonkor jarraitzen du, 1etik behera, zehazki 0,80an, aurreko datuan bezala.

Lehen aldiz, aste batzuetan, Araba "eremu gorritzat" hartzen den eremutik atera da, eta 100.000 biztanleko 500 kasutik behera ditu (498,83); Bizkaiak (642,6) eta Gipuzkoak (941,3), berriz, behera egiten jarraitzen dute.

Lurraldez lurralde aztertuta, Bizkaiak 243 positibo berri zenbatu ditu igande honetan, larunbateko 279 positiboen azpitik. Gipuzkoan 202 kutsatze berri atzeman dituzte, hau da, aurreko egunean baino 89 gutxiago. Araban 50 positibo berri izan dira, aurreko egunean baino bost gehiago. Gainera, Euskal Autonomia Erkidegotik kanpo bizi diren pertsonen artean lau kasu positibo erregistratu dira (bat gehiago).

Adinaren arabera, 499 kasu berri horietatik, 185 40 eta 64 urte artekoak dira, eta 107 19 eta 39 urte artekoak. 18 urte arteko biztanleen artean 113 kasu daude; 65 urtetik gorakoen eta 80 urtetik beherakoen artean 47 kutsatze, eta adin horretatik gorakoen artean beste 47.

100.000 biztanleko 14 egunetan metatutako intzidentzia-tasarik handiena 0 eta 18 urte bitartekoen artean dago, 730,98, eta tasarik txikiena, berriz, 65 eta 79 urte bitartekoen artean (481,15). 13 eta 16 urte bitarteko adin-tarteak, 38 kutsatze berri izan ditu igande honetan, eta 1.002,37ko intzidentzia-tasa izan du.

Euskadiko intzidentzia epidemiologikoaren bilakaera hemen kontsulta daiteke. Azken orduetan herriz herri zenbatutako positibo berriak azter daitezke, eta pandemia hasieratik atzemandako kasu guztiak eta adin taldeen araberako datuak ageri dira bertan.

Iñigo Urkullu lehendakariak "zuhurtzia" eskatu du txertoen inguruan iristen diren albisteen aurrean, garrantzitsuena prebentzio neurriak mantentzea dela azpimarratu du, eta Pedro Sanchez Espainiako presidentea kritikatu du autonomia erkidegoak kontuan hartu gabe txertaketa plan bat iragartzeagatik.

Ikastetxeen egoerari dagokionez, Iruraiz-Gaunako (Araba) Geroa Waldorf Eskolak bertan behera utzi behar izan du bere jarduera, hainbat kasu positibo atzeman baitituzte. Azaroaren hasieran, beste ikastetxe pribatu batek ere, Azitango Andre Mariaren Bigarren Hezkuntzakoak, klase presentzial guztiak atzeratu behar izan zituen.

Horrez gain, 157 ikasgela itxi dituzte COVID kasuen ondorioz, aurreko ostiralean baino bederatzi gehiago, hau da, ikasgela guztien % 0,89.

Nafarroako egoera

113 kasu atzeman dituzte igandean Nafarroan, bezperan baino 28 gehiago, Nafarroako Osasun Publikoaren eta Lan Osasunaren Institutuak (ISPLN) emandako datuen arabera.

Igoera hori gorabehera, kutsatzeen kurbak egonkor jarraitzen du, 200 kasuetako langatik behera, eta iraileko zifretatik gertu. Dena dela, positibotasun tasa % 9,2ra igo da (% 6,15ean kokatu zen bezperan), 1.221 proba eginda (1.364 egin zituzten larunbatean).

Ikuspegi epidemiologikotik, pandemiaren bilakaerari dagokionez, Nafarroako Osasun Publikoaren eta Lan Osasunaren Institutuak adierazi du atzo gaixotasun horrekin lotutako bi ospitaleratze berri izan zirela Foru Erkidegoan, batere ez ZIUn, eta bost heriotza berri izan zirela: 85, 88 eta 91 urteko hiru gizon eta 78 eta 86 urteko bi emakume. Ondorioz, 847 pertsona hil dira guztira.

Iruñean eta Eskualdean positiboen % 63 erregistratu dituzte, eta Tuteran eta Lizarran, kasuen % 13, hurrenez hurren. Gainerako positiboak (% 11) Nafarroako beste eremu batzuetan banatzen dira.

Kasu gehien pilatzen dituzten udalerri eta guneei dagokionez, aipatzekoa da Txantreako auzoan (Iruñea) atzemandako 26 kutsatzeak. 10eko langa igaro duen gune bakarra da, dena den. Gainerakoan, Arrotxapean bederatzi positibo zenbatu dituzte; Tutera Ekialdean, zortzi, eta Berriozarren eta Lizarran, zazpi.

Erregistratutako kasuen banaketari dagokionez, adin-tarteen arabera, talde handiena 15 urtetik beherakoa da (% 26), ondoren 30-44 urte artekoa (% 18) eta 45-59 urte eta 75 urtetik gorakoak (% 17). Jarraian, 15 eta 29 urte bitarteko taldea dago, % 12rekin; eta, azkenik, 60 eta 75 urte bitartekoa, kasu berrien % 10ekin. Kasu berrien batez besteko adina 42,1 urtekoa da.

Generoari dagokionez, kasuen % 50 emakumeak dira eta % 50 gizonak.

Ospitale-okupazioaren ikuspegitik, Osasunbidea-Nafarroako Osasun Zerbitzuak jakinarazi duenez, ospitaleratzeen eta alten balantzearen ondoren, 246 pertsona daude ospitaleratuta COVID-19arekin (atzo baino 6 gutxiago), horietatik 41 zainketa intentsiboetako postuetan daude (atzo baino 2 gutxiago) eta beste 34 etxeko ospitaleratzean (atzo baino bat gutxiago). Gainerakoak, 171 paziente, gela arruntetan daude.

Birusak eragindako infekzioen intzidentzia metatua 38.648 da Nafarroan.

Bestalde, 487 ikasle itzuli dira gaur, astelehena, Nafarroako sare publiko eta kontzertatuetako eskoletara, konfinamendu epeak amaitu ostean.

Aldi berean, 399 ikasle konfinatu dituzte joan den asteburuan. Guztira 1.129 ikasle daude etxean isolatuta. Nafarroako Haur eta Lehen Hezkuntzako ikasle guztien % 1,82 dira. Taldeka, 41 ikastetxetako 56 gela konfinatuta daude, hau da, prebentziorako konfinamendua izan dezaketen bizikidetza-talde egonkor guztien % 1,60.
Kontuan izan osasun agintariek koronabirusaren aurrean eman dituzten aholkuak. Albiste faltsuak zabaldu dira; beraz, agintariek emandakoei bakarrik egin kasu. Gaitzaren sintomarik baduzu, EAEn bizi bazara, osasun-zentrora deitu, eta zalantzarik izatekotan, Osasun Batzordearen telefonoa duzu eskuragarri: 900 20 30 50. Nafarroan bizi bazara, berriz, Osasun Batzordearen telefonora dei dezakezu: 948 290 290. Gogoratu COVID-19a ez hedatzeko modurik eraginkorrena eskuak sarri garbitzea dela. Ahoa estaltzeko maskarak derrigorrezkoak dira EAEn eta Nafarroan. Iparraldean, espazio publiko itxietan, garraio publikoan eta udalerri eta hiri nagusietan da derrigorrezkoa.
  • Bisitatuena

      Kargatzen ikusiena
      Kargatzen ikusiena