685 kasu berri EAEn, ZIUak urtebetean izan duten kopururik altuenera iritsi direnean

Atzo 8.876 PCR proba eta antigeno test egin ziren Euskal Autonomia Erkidegoan eta 685 covid-19 kasu berri diagnostikatu ziren, aurreko egunean baino 250 gutxiago. Positibo tasak berdin eutsi dio, % 7,7an. Datuok, hala ere, MOEk ezarritako % 5etik urruti egoten jarraitzen dute; beraz, oraingoz ezinezkoa da kontrolik gabeko transmisioa etetea.

Araban 74 positibo berri atzeman zituzten (bezperan baino 29 gutxiago), Bizkaian 317 kasu (149 gutxiago) eta Gipuzkoan 290 (68 gutxiago). Gainera, EAEtik kanpo bizi diren lau pertsonak ere positibo eman zuten.

EAEko ospitaleetako ZIUetako presioak gora egiten jarraitzen du. Apirilaren 24ko datuen arabera, 72 lagun ospitaleratu behar izan zituzten covid-19arekin (bezperan 101 izan ziren) eta  188 gaixo larri daude covid-19arekin ingresatuta, aurreko egunean baino 2 gehiago.

Ospitaleetako presioa izugarria da oraindik, ia 600 lagun daude ospitaleratuta covid-19 dela eta, eta arrazoi honengatik zaintza intentsiboetako unitateetan daudenen kopurua 2020ko apiril hasiera edo erdi aldekoarekin alderatu daiteke, taulan ikus daitekeenez:

Osakidetzak premiazkoak ez diren ebakuntzak atzeratzea aztertuko du astelehenean

Koronabirusaren ondorioz ospitaleek bizi duten egoera ikusita, 4. agertokirako prestatzen hastea aztertuko du Osakidetzak astelehen honetan; horrek, besteak beste, premiazkoak ez diren ebakuntzak atzeratzea eragin dezake.

EITB Mediak jakin ahal izan duenez, ospitale sareko erakundeei agertokia prestatzen hasteko agindua eman diete dagoeneko, covid-19aren lehen olatuan gertatu bezala.

Horri buruz hitz egin du gaur bertan Felix Zubia Donostia Ospitaleko ZIUko buruak: "Osasun sistema guztia kolokan jarri da, batez ere, Gipuzkoan ditugun datu txarrengatik", "oheak eta, batez ere, langileak behar ditugu, eta langileak nondik ateratzen dira? Kirofanoetatik. Horregatik ebakuntza asko bertan behera utzi edo atzeratu egingo dira, larrienak ez direnak, noski".

Kutsatze datuak hobera egiten ari dira, pixkanaka, Nafarroan

Bederatzigarren egunez jarraian, 200eko langatik behera geratu dira positibo berriak Nafarroan, 143 kasu zenbatu baitituzte, Foru Gobernuak emandako behin-behineko datuen arabera. Aurreko egunean baino 22 kasu gutxiago dira horiek.

Ospitaleetako egoerari dagokionez, ostiralean 202 covid gaixo zeuden Foru Erkidegoko osasun sarean ospitaleratuta, eta horietatik 37 zaintza intentsioetako unitateetan zeuden.