Gizartea -
KORONABIRUSA
407 kasu berri EAEn, positibitate tasak % 4,6an jarraitzen duen bitartean
Ospitaleetako presioak gora egin du: 61 pertsona ospitaleratu zituzten atzo, aurreko egunean baino 19 gehiago.
EITB MEDIA
EAEk 407 kasu berri atzeman ditu ostiralean, aurreko egunean baino 14 gehiago, baina positibitate tasak bere horretan jarraitzen du; azken 24 orduetan ez da igo % 4,6tik. Ospitaleko presioak, berriz, gora egin du: 61 pertsona ospitaleratu zituzten ostiralean, eta covid-19a duten 145 pertsona daude ZIUetan.
Osasun Sailak larunbat honetan jakitera eman dituen datuen arabera, 8.929 test diagnostiko egin dituzte Euskal Autonomia Erkidegoan ostiralean: 221 positibo detektatu dituzte Bizkaian, 144 Gipuzkoan, 37 Araban eta bost EAEtik kanpo bizi diren pertsonen artean.
Positibotasun tasa bere horretan gelditu da: % 4,6koa da. Duela astebeteko datuekin alderatuta, baina, egoerak nabarmen egin du hobera, % 1,2an murriztu baita.
Ospitaleen egoerak, ostera, ez du hobera egin. Asteon egoera arintzen joan den arren, datuok ez dira asko aldatu azken orduotan. Covid-19aren ondorioz 61 pertsona ospitaleratu zituzten atzo, aurreko egunean baino 19 gehiago. Gainera, 154 gaixo larri daude EAEko ZIUetan, ostiralean baino bost gehiago.
