Itxi

2021/08/30

13:24

Gizartea

koronabirusa

ZIUetako gaixoen kopurua altua da oraindik EAEn, nahiz eta intzidentzia metatua jaitsi den

Naiara Ballesteros | EITB MEDIA

Zainketa intentsiboetako unitateetan 74 paziente daude, bezperan baino hiru gehiago. Bestalde, intzidentzia-tasa metatua 340koa da, eremu gorritik kanpo, eta R0 indizea ere beherantz doa, 0,86an baitago.

  • Zainketa intentsiboetako unitatea EAEn

    Zainketa intentsiboetako unitatea EAEn. Artxiboko argazkia: EFE.

  • Whatsapp
  • Whatsapp
  • Telegram
  • Bidali

Intzidentzia-tasa metatuak behera egin duen arren, Euskadiko ospitaleetako asistentzia-presioa altua da oraindik ere, 294 gaixo baitaude ospitaleratuta: 74, zainketa intentsiboen unitateetan (larunbatean baino hiru gehiago) eta 220, gela arruntetan. Ospitaleratze berriak, baina, 27ra jaitsi dira (zortzi gutxiago).

Euskadiko Babes Zibileko Planaren (LABI) Aholku Batzordearen bileraren ostean, Gotzone Sagardui Osasun sailburuak esan du "joera aldaketa argia" dagoela, baina "beherakada horrek ez du eragin berdina asistentzian".

Hala ere, intzidentzia metatuak Euskadin beheranzko bideari eusten dio, 100.000 biztanleko 14 egunean 340,45 kasu (11 gutxiago) izan baitira.

Hiru lurraldeek eremu laranjan jarraitzen dute; hau da, 100.000 biztanleko 400 kasutik behera. Arabak jarraitzen du gehien erasandako lurraldea izaten, 357 kasuko intzidentzia-tasa metatuarekin eta 44 kasu positiborekin.

Bizkaiak 341 kasu atzeman ditu, baina EAE osoko kasu positibo gehien erregistratu ditu, 149 kasu berri. Gipuzkoak, berriz, 98 kasu berri jakinarazi ditu, eta intzidentzia-tasa 306 kasukoa da.

Adin-taldeen arabera, batek ere ez du gainditzen mila kasuren intzidentzia metatua bi astean, aurreko astean bezala. Altuena 17 eta 18 urte arteko gazteena da, 962,72 baita.

Gasteizen 35 kasu berri eta 387 kasuko intzidentzia metatua dago, Bilbon 47 pertsona daude kutsatuta eta 308 kasuko intzidentzia metatua dago, eta Donostian 26 kasu positibo berri eta 281 kasuko intzidentzia metatua dute.

Honakoa ere zure interesekoa izan daiteke: Araba eta Gasteiz eremu gorritik irten dira

Positibotasunari dagokionez, 3.543 proba egin dituzte igandean, hau da, larunbatean baino 1.018 gutxiago, eta 296 positibo (+15) atzeman dituzte; beraz, % 6,2tik % 6,5era jaitsi da, Osasun Sailaren datuen arabera.

Birsorkuntza indizea (kasu positibo bakoitzak zenbat pertsona kutsatzen dituen adierazten du) 0,88koa zen ostiralean, 0,84koa larunbatean eta 0,86koa igandean; Araban 0,77an dago, Bizkaian 0,85ean eta Gipuzkoan 0,91n. Intzidentzia-tasen arrazoia (egungo intzidentzia-tasa metatua duela astebetekoarekin alderatzen du) 0,78koa da (-0,01).

Datu horiek ikusita, indarrean dauden murrizketetako batzuk leuntzea erabaki du LABIren Aholku Batzordeak. Edukierak % 35etik % 60ra igaroko dira, oro har, saltoki eta kultur guneetan, eta % 50era ostalaritzan; izan ere, mahai bakoitzeko gehienezko edukiera 6tik 8ra igoko da asteazkenetik aurrera. Halaber, 5.000 ikusletik gorako futbol estadioetan eta esparruetan edukiera % 20tik % 30era igoko da.

Honakoa ere zure interesekoa izan daiteke: Ikastetxeek joan den ikasturteko neurriak mantenduko dituzte

Txertaketari dagokionez, Euskadin txertoa har dezaketen herritarren ia % 80k osatu du dagoeneko covid-19aren aurkako txertaketa-jarraibidea, eta, bizpahiru astetan, guztiek gutxienez dosi bat inokulatuta izango dute, Sagarduiren arabera.

Sailburuaren hitzetan, "txertaketa kanpaina ondo doa". "Hiru edo lau aste pasatxoan jarriko zaie txertoaren lehen dosia xede-populazioari", gaineratu du.

Nafarroako egoera

Covid-19ak kutsatutakoen kopuruak gora egin dute igande honetan Nafarroan, larunbateko datuekin alderatuta, baina 100etik behera jarraitzen du, 70 positibo berri zenbatu baitituzte, eta bost pertsona ospitaleratu dituzte, horietako bat ZIUn. Gainera, covid-19a zuen beste gaixo bat hil da.

Kontuan izan osasun agintariek koronabirusaren aurrean eman dituzten aholkuak. Gaitzaren sintomarik baduzu, EAEn bizi bazara, osasun-zentrora deitu, eta zalantzarik izatekotan, Osasun Batzordearen telefonoa duzu eskuragarri: 900 20 30 50. Nafarroan bizi bazara, berriz, Osasun Batzordearen telefonora dei dezakezu: 948 290 290. Gogoratu covid-19a ez hedatzeko modurik eraginkorrena musukoa erabiltzea, espazioak aireztatzea, segurtasun-distantzia gordetzea eta eskuak sarri garbitzea dela.
  • Bisitatuena

      Kargatzen ikusiena
      Kargatzen ikusiena
    ;