Mundua -

Gerra Gazan

Israelek eta Hamasek su-eten humanitarioa egun batez luzatzea adostu dute

Hamasek hamar bahitu askatu ditu ostegun honetan, eta Israelek askatutako preso palestinarren artean gutxienez 23 adingabe eta zazpi emakume daude. Bestalde, hiru pertsona hil dira eta beste sei zauritu dira Jerusalemen tiroz egindako eraso baten ondorioz.

Su-eten humanitarioan bi aldeek bahituak eta presoak askatu dituzte. Argazkia: EFE.
Su-eten humanitarioan bi aldeek bahituak eta presoak askatu dituzte. Argazkia: EFE.
Su-eten humanitarioan bi aldeek bahituak eta presoak askatu dituzte. Argazkia: EFE.

Agentziak | EITB Media

Whatsapp Facebook Twitter Telegram Email

Hamasek eta Israelek Gazako Zerrendan su-eten humanitarioa beste egun batez luzatzeko akordioa lortu dute, Qatarrek goizaldean iragarri duenez.

Majid al Ansari Qatarreko Atzerri Ministerioko bozeramaileak ziurtatu duenez, su-etena indarrean egongo da ostegun honetan, "orain arteko baldintza berberekin". Aldi baterako "su-etena eta laguntza humanitarioaren sarrera dira" baldintza horiek bere hitzetan.

"Qatarreko Estatuaren, Egiptoko Arabiar Errepublikaren eta Estatu Batuen bitartekaritzaren esparruan" lortu dela etenaldi honen luzapena jakinarazi du.

Su-eten humanitarioak zazpigarren eguna izango du gaur. Aurreko ostiralean hasi zenetik, laguntza humanitarioa sartzeaz gainera, bahituak eta presoak aske utzi dituzte bi aldeek.

Bahituen eta presoen trukeak aurrera jarraitzen du

Qatarko Atzerri Ministerioak ostegun honetan jakitera eman duenez, su-eten humanitarioaren zazpigarren egunean gutxienez hamar bahitu askatu dituzte, besteak beste, bezperan Israelera itzuli ziren bi errusiarrak (akordioaren parte ez direnak) eta arratsaldean etxera itzuli diren bi emakumeak.

Zehazki, Gurutze Gorriaren lanari esker egin den truke berri honetan, gutxienez bi adingabe eta herritartasun bikoitzeko sei emakume daude, horien artean mexikar bat, errusiar bat eta uruguaitar bat.

Bestalde, Qatarko Atzerri Ministerioak adierazi du askatutako preso palestinarren artean gutxienez 23 adingabe eta zazpi emakume daudela.

Erasoa Jerusalemen

Bien bitartean, Jerusalemen hiru pertsona (24 urteko emakume bat, 73 urteko gizon bat eta 60 urte inguruko emakume bat) hil dira gaur goizean, tiroz egindako eraso batean. Beste sei pertsona zaurituta eraman dituzte erietxeetara. Horietako hiru egoera kritikoan daudela jakinarazi du Poliziak.

El ataque ha sido perpetrado en una parada de autobús. Foto:EFE

Polizia-iturriek adierazi dutenez, erasotzaileak Jerusalem ekialdeko bi palestinar izan dira eta lekuan bertan hil dira, zibil armatu batek eta une horretan lanean ari ez ziren bi soldaduk "neutralizatu ondoren".

Halaber, gertakizunaren inguruko ikerketa hasi dutela baieztatu dute. Esan dutenez, erasoa pistola batekin eta M-16 errifle batekin egin dute eta lekuan bertan zegoen auto batean hainbat kartutxo eta munizio aurkitu dituztela jakinarazi dute.

Gazako zerrendan gerran dauden bitartean, tentsioak gora egin du Jerusalemen eta Zisjordanian. Israelek sarekadak areagotu ditu Zisjordanian, "terrorismo ekintzen susmagarriak" atxilotzeko. Bertan, gutxienez 247 palestinar hil dira soldadu palestinarrekin izandako liskarretan urriaren 7tik. Kolonoek 9 lagun hil dituzte.

Preso Palestinarren Elkartearen esanetan, Israelek 3.200 palestinar baino gehiago atxilotu ditu Zisjordanian eta Jerusalem ekialdean. Tropa israeldarrek kopuru hori 1.800 ingurura murriztu dute.

Hau zure interesekoa bada, baliteke beste gai hauek ere izatea
Nazioartea Gazako Zerrenda Eguneko albisteak Albisteak Israel Qatar Giza eskubideak gaur Jerusalem Ekialde Hurbileko albisteak Hamas