Politika -
Abenduko CIS
PSOEk 2,3 puntu galdu ditu, baina PPri ia hamar puntuko aldea ateratzen dio
Bestalde, Ciudadanosek botoen % 17,9 lortuko lituzke, eta Unidos Podemosek eta haren koalizioek % 14,9. Bitartean, VOXek, bozen % 3,7arekin, Diputatuen Kongresuan ordezkaritza lor dezake.
Agentziak | Erredakzioa
Ikerketa Soziologikoen Zentroak (CIS) Iritzi Barometroa egin zuen iragan abenduan. Inkestaren arabera, PSOE lehen indarra izango litzateke hauteskunde orokorretan. Bozen % 28,9 eskuratuko lituzkete sozialistek, eta PPri 9,8 puntuko aldea aterako liokete. Alderdi Popularra bigarren indarra izango litzateke, botoen % 19,1ekin. Bitartean, VOXek, bozen % 3,7arekin, Diputatuen Kongresuan ordezkaritza lor dezake.
Horrela, PSOEren atzetik, Ciudadanosek babesen % 17,9 lortuko lituzke, eta Unidos Podemosek eta haren koalizioek % 14,9.
Era berean, PSOE alderdirik bozkatuena litzateke Europako hauteskundeetan. Sozialistek bozen % 19,7 eskuratuko lituzkete, eta PPri bost puntu baino gehiagoko aldea aterako liokete, CISen arabera. Alderdi Popularrak botoen % 14,3 lortuko lituzke.
Inkestaren arabera, PSOEren eta PPren atzetik Ciudadanos legoke, babesen % 10,6rekin, eta Podemos eta haren koalizioak (% 9,6). Ondoren, ERCk bozen % 3,1 lortuko lituzke; VOXek % 2,1 eta EAJk zein Pacmak % 1,2. EH Bilduk bozen % 1,1 bilduko lituzke. PDeCATek botoen % 0,6 bakarrik eskuratuko lituzke.
Bestalde, immigrazioarenganako kezkak lau puntu gora egin du abenduan. Honezkero, seigarren arazoa bihurtu da. Hala ere, langabeziak kezka nagusia izaten jarraitzen du.
Langabezia inkestatuen % 59,2k aipatu dute, aurreko hilean baino zazpi hamarren gehiago. Bitartean, immigrazioa % 12,5ek aipatu dute, azaroan baino ia lau gehiagok.
