Gasteizko gotzaina: 'Elizan ez dago desadostasunik Francoren lekualdatzearekin'

Juan Carlos Elizalde Gasteizko gotzainak adierazi duenez, Eliza katolikoan ez da inolako desadostasunik izan Francisco Francoren gorpuzkiak Erorien Haranetik El Pardo auzoko Mingorrubioko hilerrira eramateko erabakiarekin. Ildo horretatik, Santiago Cantera Erorien Haraneko prioreak agertutako oposizioa "iritzi askatasunaren baitan" kokatu du.

Europa Forumean egindako agerraldian, Elizaldek azpimarratu du Espainian Eliza katolikoaren gobernu-organo nagusia den Gotzainen Biltzarrak Estatuko hiru botereek hartu dituzten erabakiak une oro errespetatu dituela, "betiere pertsonei zor zaien errespetuarekin egiten bada".

"Elizaren barruko sentsibilitate batzuek beste iritzi batzuk eman dituzte, eta onargarria da eta egin dezakete, Elizan gizartearen beste estamentuetan baino iritzi askatasun askoz handiagoa baitago", esan du Elizaldek, eta iritzi horiek "ez dira jokabide ezberdinetan gauzatu", gaineratu du.

"Elizak pentsatzen duena esaten jakitea eta pertsonekiko errespetua eskatzea da garrantzitsuena, eta horrela egin da. Ez dago desadostasunik", esan du.