Politika -
Inbestidura
EH Bildu, ERC eta CUP ez dira Espainiako erregearen bilera-sortan izango
Inbestidura dela eta, Felipe VI.enak abiatuko duen bilera-sortan 19 alderdi politikotako bozeramaileak izango dira, tartean EAJkoa.
AGENTZIAK | ERREDAKZIOA
EH Bilduk, ERCk eta CUPek uko egingo diote Espainiako erregeak inbestidura saiora begira abiatuko duen bilera-sortan parte hartzeari.
Meritxell Batet Kongresuko presidenteak Felipe VI.enarekin bildu da gaur goizean Zarzuela Jauregian eta kontsultetan izango diren alderdien zerrenda helarazi dio. Guztira, 19 ordezkari politiko batzartuko dira Espainiarreko erregearekin, tartean EAJkoa.
ERCk ez du Felipe VI.ena solaskide politiko gisa aitortzen, eta 2017ko urriaren 3an, Kataluniako erreferendumaren harira, egin zuen adierazpen politikoa salatu du berriro ere.
EH Bilduk esan du ez dela bilera horietara joango, Espainiako erregearen menpe ez dagoelako eta monarkia Estatuaren sinbolo antidemokratikoena delako.
Mireia Vehi CUPeko bozeramaileak Kongresuan egin duen agerraldian azpimarratu du bere alderdiarentzat monarkia ez dela erakunde demokratikoa, eta, ildo horretan, erregeari inolako azalpen politikorik eman behar ez diotela erantsi du.
