Teresa Rodriguezen sektorea Podemosetik aldendu da eta greba babestu du

Andaluziako idazkaritza nagusiaren buru diren Podemoseko sektore antikapìtalistak, Teresa Rodriguezek eta Miguel Urban eurodiputatuak ELA eta LAB sindikatuek eta pentsionistek EAEn eta Nafarroan deitutako greba orokorra babestea erabaki dute.

Podemoseko alde ezkertiarrena alderdiaren jarrera ofizialetik aldendu da. Alderdiak mobilizazioan parte ez hartzea erabaki du, PSOEren eta Unidas Podemosen Gobernuari "denbora apur bat" eman behar zaiola argudiatuz.

Podemos Euskadiko Andeka Larrea komunikazio idazkariak adierazi zuenez, oraingoz ez dute "greba orokor bat egiteko aukera" partekatzen antolatzaileekin. Grebaren eskakizunak “bermatu” nahi dituen Gobernu berriari "denbora apur bat" emateko aldarrikatu zuen prentsaurreko batean.

Podemoseko antikapitalistak kritiko agertu ziren PSOErekin koalizio-gobernuan sartzearen alderdiaren erabakiarekin. Orain, sektore horrek greba babestea erabaki du."Beharrezkoa da 2011ko eta 2013ko erreformetan onartutako pentsioen murrizketak indargabetzea", adierazi dute. Gainera, PPren lan-erreformaz gain, Jose Luis Rodriguez Zapateroren Gobernu sozialistak aurrera eramandako lan-erreforma indargabetzea ere eskatu dute.

Era berean, Estatu espainiarrak "kolan jarraitzen du pentsioei dagokienez", adierazi du Miguel Urbanek. "Koalizio-gobernu berria behetik estutzen jarraitu behar da, Frantziaren eredua jarraituz", baieztatu du.

Estatu osoan mobilizatzeko deia egin dute

Unidas Podemoseko eurodiputatuak 'Edonork gobernatuta ere, pentsio publikoak babesten dira' leloari egin dio erreferentzia. Lelo horrekin beste manifestazio batera deitu dute Madrilen EAEko eta Nafarroako greba babesteko.

Sektore antikapitalistak greba babesten duten elkarretaratzeetan parte hartzera deitzen ari da "Estatu osoan zehar".

Madrilgo antikapitalistek bilera ireki bat antolatu dute ostiralerako "gobernu berriak irekitako egoerari nola aurre egin" aztertzeko. Gobernu berria "eskuin erradikalengatik", "lurraldetasunaren zentraltasunagatik" eta "programa sozial eta ekonomiko aurrerakoi ahulagatik" bereizten dela adierazi dute.