Politika -
Erasoa
Erasoa jasan zuen PPko militanteak salaketan jasotakoa berretsi du epailearen aurrean
Ustezko erasotzailearen kontrako epaiketaren lehen saioa izan da gaur, ateak itxita. Erasotuak eta ustezko erasotzaileak deklaratu dute. Fiskalak gorroto deliturik izan den argitu nahi du, eta, horregatik, epaiketa azkarra egin beharrean, ohiko prozedurari jarraituko diote.
Agentziak | Eitb media
Aurreko asteburuan Gasteizen eraso zioten PPko militanteak eta ustezko erasotzaileak gaur deklaratu dute epaile aurrean, ustez erasoa egin zuen 20 urteko emakumearen kontrako epaiketaren lehen saioan.
Ateak itxita egin den saioan, Ander Garcia Oñate PPko militantearen abokatuak hitz egin du salatzailearen ordez, eta hark salaketan jasotakoa berretsi du. Horren esanetan, irain eta oihu artean, ukabilkada bat eman zion erasotzaileak aurreko asteburuan izandako erasoan "PPko militante izateagatik".
Garcia Oñate PPko militanteak jasandako erasoaren aurrean, epaiketa azkar bat egitekoak ziren asteartean, baina Fiskalak argitu nahi du erasoaren atzean gorroto deliturik izan den; hori dela eta, aldatu egin da prozedura, eta ohiko epaiketa egingo da.
Erasoa azken aurreko asteburuan gertatu zen, irailaren 4an, Gasteizen. Antza denez, 20 urteko emakume batek ukabilkada bat eman zion gizonezkoari. Handik gutxira atxilotu zuen Ertzaintzak emakumea.
Erasotuak aurkeztutako salaketan jasotzen denez, "fatxa" eta "Gora ETA!" irain eta oihu artean eraso zioten, Arabako PPko iturrien esanetan.
Lekukoek aurrerago deklaratuko dute, baina oraingoz ez dago horretarako datarik zehaztuta.
